Այսօր ՀՀ կառավարության շենքի մոտ ակցիա են անցկացրել Արամի, Բուզանդ, Եկմալյան, Սարյան փողոցների խաբված բնակարանատերերը, ովքեր արդեն 10 նամակ են գրել պետական տարբեր գերատեսչություններին, այդ թվում` Արդարադատության նախարարություն, Երևանի քաղաքապետարան, ինչպես նաև ՀՀ նախագահ Սերժ Սարգսյանին: Բնակարանատերերը նշում են, որ խնդիրը չի լուծվել, իսկ գերատեսչություններն անգամ չեն պատասխանել իրենց նամակներին:
Epress.am-ի հետ զրույցում ակցիայի մասնակիցներից մեկը` Անահիտ Պողոսյանը, պատմել է, որ բնակարանատերերի խնդրով զբաղվող ֆինանսների նախարարության գլխավոր խորհրդական Հայկ Դավթյանը երեկ ընդունել է իրեն:
«Դավթյանը խոստացել էր ուսումնասիրել մեր գործերը, բոլորիցս փաստաթղթեր է հավաքել, հիմա նա ասում է, որ բոլորիս գործերն էլ օրինական ձևակերպում ունեն, կա վճիռ, կա կնիք, և ինքը ոչինչ չի կարող անել: Առաջարկում է դիմել դատարան»,- մեզ հետ զրույցում պատմել է Անահիտ Պողոսյանը:
Ինչպես հայտնել է ակցիայի մեկ այլ մասնակից Սոնա Մաղաքյանը, իրենք նման հիասթափեցնող պատասխան են ստացել նաև Արդարադատության նախարարության օրինականության վերահսկման վարչության պետ Նորայր Փանոսյանից:
«Փանոսյանն ասում է` մեկ ամիս է անցել, բայց մեկ չի, չորս է: Բացի դա, մենք չենք տեսնում` իրենք զբաղվում են գործով, թե ոչ: Նոտարական գրասենյակը Արդարադատության նախարարությանն է ենթարկվում: 2006 թվականից ի վեր սխալ գործարքներ են կազմել, մի՞թե այսքան տարների ընթացքում նախարարությունը ստուգումներ չի իրականացրել, որ ոչ մի գործ չի բացահայտել»,- ասել է Սոնա Մաղաքյանը:
Կառավարության նիստի ավարտին բողոքող մարդկանց լսել է պատգամավոր Անահիտ Բախշյանը: Նա խնդրել է իրեն ներկայացնել գործի բոլոր մանրամասները, որպեսզի նա ԱԺ-ում իր հաջորդ ելույթը նվիրի խաբված քաղաքացիների խնդրին:
Հիշեցնենք, որ 2006 թվականին բնակիչները դուրս են եկել իրենց տներից, որոնք հետագայում քանդել են, և դրանց փոխարեն կառուցվել են նոր բազմաբնակարանային շենքեր: 2006 թվականին «Գապբնակշին» ընկերության տնօրեն Գագիկ Պապոյանը պայմանագիր է կնքել իրենց հետ շենքը պատրաստ լինելուց հետո բնակարանով ապահովելու պայմանով, սակայն բնակարանները մինչ օրս չեն ստացել, դրանք վերավաճառվել են երրորդ անձանց: Դեպքի առնչությամբ անցյալ տարվա վերջին քրեական գործ են հարուցել, Պապոյանը փախուստի է դիմել: Բնակիչները Epress.am-ին պատմել են, որ ՀՔԾ-ում իրենց ասել են, թե գործը կարող է ամիսներ տևել, քանի որ դեպքերի առնչությամբ հարյուրավոր անձանց պետք է հարցաքննել:
Քաղաքացիներին խաբած «Գապբնակշին» ընկերությունը 2012թ. հունվարի մեկից լուծարվել է: Բնակիչները կարծում են, որ սա պատասխանատվությունից խուսափելու փորձ է Գագիկ Պապոյանի ընկերության կողմից: