ՀՀ ճանպարհային ոստիկանության նախկին պետ Մարգար Օհանյանի և նույն գործով որպես մեղադրյալներ անցնող Ճանապարհային ոստիկանության 2-րդ սպայական գումարտակի նախկին հրամանատար Ստեփան Կարախանյանի, Ճանապարհային ոստիկանության աշխատակիցներ Արա Լևոնյանի և Սամվել Մախմուրյանի գործով դատավարության ժամանակ այսօր հարցաքննվել է միայն մեկ վկա` Արսեն Արշակյանը: Վերջինս ներկայումս 2-րդ սպայական գումարտակի հրամանտարն է, իսկ նախկինում եղել է առաջին սպայական գումարտակի հրամանատարը:
Նա դատարանում տված իր ցուցմունքում հայտնել է, որ գումարտակին տրվող վառելիքը չէր բավականացնում և որ ինքն այդ խնդրով դիմել է Ստեփան Կարախանյանին: Վերջինս ասել է, որ դա արվում է Մարգար Օհանյանի ցուցումով: Արշակյանն ասել է, որ նույն հարցով դիմել է Օհանյանին, ով, ըստ Արշակյանի, պատասխանել է, որ տեղյակ է, որ քիչ բենզին են ստանում:
Մարգար Օհանյանի այն հարցին, թե այդ դեպքում ինչու նա անօրինականությունների մասին գրավոր չի դիմել համապատասխան մարմիններին, Արշակյանը պատասխանել է, որ ինքը տեղյակ էր, որ այդ բենզինը օգտագործվում է ծառայության համար, և եթե իմանար, որ այլ նպատակների է ծառայեցվում, կդիմեր: Արշակյանը նաև ասել է, որ քիչ բենզինի պատճառով իրենց ծառայությունը չի տուժել:
Վկայի հարցաքննությունից հետո դատավոր Մխիթար Պապոյանն ընթերցել է գործով արդեն հարցաքննված վկա Եղիշե Ենգիբարյանի գրավոր դիմումը` ուղղված դատարանին: Գրության մեջ նա նշել է, որ դատարանում տված իր ցուցմունքները սխալ են եղել, քանի որ ինքը դատարանում կաշկանդված է եղել և խնդրում է հիմք ընդունել իր` նախաքննության ժամանակ տված ցուցմունքները: Հիշեցնենք, որ Ենգիբարյանը սպայական գումարտակի առաջին վաշտի հրամանատարն է, և դատարանում տված իր ցուցմունքում նա սկզբում նշել է, որ ինքը ամսական ստացել է 350 լիտր բենզին և որքան ստացել է, այդքանի տակ էլ ստորագրել է:
Իսկ երբ մեղադրող Հարություն Հարությունյանը հարց է ուղղել Ենբգիբարյանին` արդյոք աշխատակիցները երբևէ դժգոհել են բենզինի պակասից, վերջինս պնդել է, որ դժգոհոթյուններ չեն եղել, սակայն ինքը խոսակցություններ է լսել, որ նման խնդիրներ եղել են, բայց ոչ իր հետ: Դրանից հետո դատախազը հայտարարել էր, որ Ենգիբարյանի` դատարանում տված ցուցմունքի և նախաքննության ընթացքում տված ցուցմունքների մեջ կան էական հակասություններ, և միջնորդել էր դատավորին ներկայացնել նախաքննության ժամանակ տված ցուցմունքները:
Ըստ նախաքննության ժամանակ տրված ցուցմունքի` Ենգիբարյանը նշել է, որ իր աշխատակիցները դժգոհել են բենզինի պակասից և որ ղեկավարությունն այդ մասին տեղյակ էր: Այդ հակասությունը Ենգիբարյանը բացատրել էր նրանով, որ այն ժամանակ սխալմունք է տեղի ունեցել, քանի որ նախաքննության ժամանակ էլ ինքը նշել էր, որ դժգոհությունների մասին պարզապես խոսակցություններ է լսել և որ ինքն անձամբ նման խնդիրներ չի ունեցել: Սակայն այսօր, ինչպես պարզվեց իր ուղարկած գրությունից, գնդապետի ուսադիր կրող Ենգիբարյանը դատարանում դարձյալ սխալ ցուցմունք է տվել: Այս առնչությամբ Մարգար Օհանյանն ասել է.
«Պարզից էլ պարզ էր, որ վկայի վրա ճնշում է եղել, որ նման դիմում գրի: Սակայն դատարանում գտնվող թե լրագրողները, թե մյուս մասնակիցները տեսան, որ նա դատարանում կաշկանդված չի եղել»:
Այնուհետև դատարանում ընթերցվեցին երկու վկայի` Արմեն և Մերուժան Կարապետյանների նախաքննական ցուցմունքները, որոնց ներկայությունը օբյեկտիվ պատճառներով հնարավոր չի եղել ապահովել դատարանում: Նրանք երկուսն էլ նշել են, որ ստացել են քիչ քանակությամբ բենզին, սակայն ստորագրել են ավելի շատ ստացած թվի տակ: Հաջորդ դատական նիստին կհարցաքննվի Նիկողայոս Եղիազարյանը, ում պատշաճ կերպով ծանուցվել է, սակայն նա չի ներկայացել դատարան:
Դատարանն առայժմ զերծ կմնա նրան բերման ենթարկելու որոշում կայացնելուց և կփորձեն հաջորդ դատական նիստի համար նրան ևս մեկ անգամ ծանուցել:
Դատական նիստի ավարտից հետո` մինչ դատարանից կտանեին Մարգար Օհանյանին, լրագրողները մի քանի հարց ուղղեցին նրան: Այն հարցին, թե ինչու վկա Ենգիբարյանը փոխեց իր ցուցմունքը, Օհանյանն ասել է.
«Դուք արդեն լսել եք, տեսել եք` վկան կաշկանդված եղել է թե ոչ, ինքներդ որոշեք: Ես իմ ցուցմունքում ամեն ինչ կասեմ»:
Նշենք նաև, որ այսօրվա դատական նիստին մասնակցում էր նաև ԱԺ նախկին պատգամավոր, ՀՀԿ-ական Հակոբ Հակոբյանը: Իսկ նախորդ դատական նիստի ժամանակ դատարանում էր նաև ԲՀԿ խմբակցության պատգամավոր Հարություն Ղարագյոզյանը:
Հաջորդ դատական նիստը կկայանա փետրվարի 7-ին, ժամը 12.30-ին: