Epress.am Լուրեր Հայաստանից
Կառավարության շենքի մոտ այսօր բողոքի ակցիա անցկացնող ազատամարտիկները պահանջել են անմխիթար պայմաններում չթողնել հայրենիքի համար կռված մարդկանց ու իրենց ընտանիքները, բարձրացնել թոշակները, ապահովել անվճար բուժօգնություն:
Ազատամարտիկները իրենց իրավունքների համար պայքարը արդյունավետ դարձնելու համար ստեղծել են նոր միավորում ՝«Շուշի 1992», որը շուտով կունենա էլեկտրոնային կայք, տեղեկատվություն կտարածի: Միավորումն ունի իրավապաշտպաններ, իրավաբաններ, բժիշկների թիմ, ովքեր համակարգելու են գործընթացները ուղղված ազատամարտիկների կեցության պայմանների բարելավմանը:
«Մենք մեղավոր չենք, որ չենք զոհվել, կամ չենք վիրավորվել, բայց հարցրեք՝ ինչքան թոշակ ենք ստանում, որ դեղերի չի բավարարում: Հիմա կոչ եմ անում հասարակությանը, ոնց որ մենք ենք ձեզ համար կռվել, հիմա էլ դուք մեր համար պայքարեք: Մեր հարցը պետք է լուծվի, քանի որ եթե վաղը, մյուս օրը պատերազմ եղավ, էլի էս տղեքն են գնալու կռվելու», – լրագրողների հետ զրույցում ասել է ազատամարտիկ Իշխան Սարգսյանը:
Նա կարծիք է հայտնել, որ կառավարության անտարբերությունը ազատամարտիկների հանդեպ փոխանցվել է նաև ժողովրդին: Եթե մի ժամանակ ազատամարտիկների կենացն ամեն սեղանի առաջին կենացն էր, ապա այժմ կռված մադկանց չեն հիշում:
Ազատամարտիկ Գրիգոր Գևորգյանը նշել է, որ իրենց հարգում են այլ կառավարությունները: Օրինակ, ինքը մեդալ է ստացել Իրաքից՝ այնտեղ 2005 թվականին խաղաղապահ գործողություններին մասնակցելու համար:
