Խաղաղությունը զենքով չե՛ն ստեղծում․ Երևանում «Ո՛չ պատերազմին» երթ կանցկացնեն

Օգոստոսի 8-ին, առավոտյան ժամը 9․00-ին Հանրապետության հրապարակից՝ ԱԳՆ շենքի առջևից սկսվելու է «Ոչ պատերազմին» անունը կրող խաղաղության երթ Հրապարակ-ՌԴ դեսպանատուն-Մաշտոցի պողոտա- Ազատության հրապարակ երթուղիով։

Երթի նախաձեռնողները հիշեցնում են, որ հայ-ադրբեջանական և ադրբեջանա-ղարաբաղյան շփման գծում կրկին լարված իրավիճակ է․ չի պահպանվում հռչակված զինադադարը, սահմանին պարբերաբար հնչող փոխհրաձգությունների, սադրանքների ու դիվերսիոն գործողությունների հետեւանքով երկու կողմից մարդկային կորուստներ են արձանագրվում:

«Մարդկային կյանքը բարձրագույն արժեք է և այն չի կարող ստորադասվել իշխանական բարձր ատյաններում որոշումների կայացման մենաշնորհ ստանձնած քաղաքական գործիչների ու պետությունների ղեկավարների ընտրած քաղաքականությանը։ Քանի որ երկու հասարակություններն օտարված են քաղաքական որոշումներ ընդունելուց, նրանց այդ որոշումները պարտադրվում կամ հրամցվում են:

Մենք հայտարարում ենք, որ շփման գծում արձանագրված զոհերի համար պատասխանատու են Ադրբեջանի և Հայաստանի իշխանությունները, ինչպես նաեւ տարածաշրջանում շահեր հետապնդող երրորդ ուժերը:

Կովկասյան տարածաշրջանում գերակա շահ հետապնդող կողմերից է Ռուսաստանը, որը վերջին 100 տարվա ընթացքում անմասն չի մնացել կոնֆլիկտներ ու ժողովուրդների միջեւ ատելություն ու թշնամություն հրահրելուց։ Այսօր էլ հայ-ադրբեջանական սահմանին թափվող արյան համար պատասխանատուներից է ՌԴ-ում իշխող ռեժիմն ու նրա պարագլուխը:

Հաշվի առնելով, որ հայ-ադրբեջանական ու ադրբեջանա-ղարաբաղյան հակամարտությունը դե յուրե գտնվում է խաղաղ կարգավորման փուլում, ԵԱՀԿ Մինսկի խումբը նույնպես պատասխանատու է սահմանին պարբերաբար սրվող իրավիճակի համար եւ բացի կողմերին խաղաղություն պահպանելու մասին կրավորական կոչեր հնչեցնելուց՝պարտավոր է ձեռնարկել կոնկրետ քայլեր արյունահեղությունը դադարեցնելու նպատակով:

Որպես առաջնահերթ քայլ` միջնորդները պարտավոր են ներդնել բոլոր ջանքերը շփման գծից դիպուկահարներին անհապաղ հեռացնելու ուղղությամբ», – ասված է նախաձեռնող խմբի հայտարարության մեջ:

Նախաձեռնության անդամները նշում են, որ իրենք դեմ են պատերազմին և հայ-ադրբեջանական ու ադրբեջանա-ղարաբաղյան հակամարտությունը զենքի ուժով լուծելու` նկատելի միտումներին, քանի որ խաղաղությունը զենքով չե՛ն ստեղծում։

«Երկու երկրների հանրույթները պետք է համախմբվեն և ստեղծեն հանրային քննարկումների հարթակներ՝ սեփական պատկերացումներով հակամարտության լուծման նպատակով։ ՄԵՆՔ ԽԱՂԱՂՈՒԹՅՈՒՆ ենք ուզում», – եզրափակում են նախաձեռնության անդամները:

Նախաձեռնող խմբի անդամներն են՝ 

Գայանե Առուստամյան, լրագրող
Աննա Շահնազարյան, բնապահպան
Անտոն Իվչենկո, հասարակական գործիչ
Զարուհի Հարությունյան, լրագրող
Զարուհի Հովհաննիսյան, հրապարակախոս
Լալա Ասլիկյան, հասարակական գործիչ, իրավապաշտպան
Արթուր Պետրոսյան, արվեստագետ
Արևիկ Մարտիրոսյան, սոցիոլոգ