«Սասնա ծռերի» աջակիցներն այսօր գնացին «դեպի Բաղրամյան». Խորենացին դատարկ մնաց

ՊՊԾ գունդը գրաված «Սասնա ծռեր» խմբի աջակիցները, որոնք օրեր շարունակ հավաքներ են անցկացնում Խորենացի փողոցում, Երևանի կենտրոնից հեռու չեն գնացել: Ինչպես և հուլիսի 27-ին, մարդիկ երեկոյան հավաքվել են Ազատության հրապարակում, բայց, ի տարբերություն նախորդ օրվան, երթով Խորենացի փողոց չեն գնացել:   

Ազատության հրապարակում ցուցարարները երկար ժամանակ որոշում էին, թե ինչ երթուղով կարելի է երթ անցկացնել:

«Ժառանգություն» կուսակցության փոխնախագահ Արմեն Մարտիրոսյանը, ով նաև հանրահավաքները համակարգող խմբի անդամ է, քաղաքացիներին առաջարկել է գնալ դեպի Բաղրամյան պողոտա, ինչը մարդկանց մի մասի դուրը չի եկել:  Կարծիքներ են հնչել, որ պետք է կրկին գնալ Խորենացի փողոց, քանի որ «Սասնա ծռերի» վրա կարող են ամեն րոպե հարձակվել:

Այնուամենայնիվ, համակարգող խումբը երթը տարել է Բաղրամյան պողոտայի ուղղությամբ: Այդ պահին տեղացող ուժեղ անձրևի պատճառով ցուցարաների թիվը նկատելիորեն պակասել է: Մարդիկ կանգնել են Մաշտոցի պողոտայի և Սայաթ-Նովայի փողոցի հատման կետում ու երթևեկությունն այնտեղ մի պահ դադարեցվե էլ:

Ոստիկանները փակել են մարդկանց ճանապարհը, իսկ Մարտիրոսյանը հայտարարել է, թե ինքն ասել էր գնում են «դեպի Բաղրամյան պողոտա», ոչ թե «Բաղրամյան պողոտա»:

Ի վերջո, մարդիկ վերադարձել են Ազատության հրապարակ: Մարտիրոսյանն ասել է, թե «Սասնա ծռեր» խմբի անդամներն իրենց ճիշտ կհասկանան, եթե մարդիկ այժմ գնան տուն, քանի որ բոլորը թրջվել են և հնարավոր է հիվանդանան: Նա նշել է, որ իրենք քաղաքացիական անհնազանդության ակցիա են անցկացրել և վաղը կրկին հավաքվելու են 19:00-ին:

Մինչ Ազատության հրապարակում հավաքվածները քննարկում էին անելիքները, Խորենացի փողոցում կրկին ոստիկանների պատ էր շարվել էր: Ցուցարարները, սակայն, այդպես էլ չերևացին: 

«Սասնա ծռեր» խմբի անդամները հուլիսի 17-ից գտնվում են գրաված ՊՊԾ գնդի տարածքում: Վերջին օրերին իշխանությունները նրանց սնունդ չեն փոխացնում:

Լուսանկարում՝ ոստիկանները Խորենացի փողոցում