Epress.am Լուրեր Հայաստանից
Եղեգիս խոշորացված համայնքի Վարդահովիտ գյուղը 2000 մետրից ավել բարձրության վրա է, այն ռազմավարական հանգույց է Վարդենիսի լեռնանցքի համար։ Վարչական շրջանի ղեկավար Սամվել Գևորգյանը պատմում է, որ համայնքի խոշորացումից հետո բյուջեի բաշխման առումով գյուղը տուժում է։
Վերջերս տեղեկատվություն էր տարածվել, որ Վարդահովիտ գյուղում «Գեոմայնինգ» ընկերությունը ցանկանում է բազմամետաղ հանքավայր շահագործել և առաջիկայում պետք է հանրային լսումներ տեղի ունենային։
Եղեգիս խոշորացված համայնքի ավագանու անդամ շատինցի Նորայր Մարտիրոսյանը պատմեց, որ «Գեոմայնինգը» փորձել է խաբեությամբ հանրային լսումներ անցկացնել, սակայն իրենք իմացել են և թույլ չեն տվել։ «Մենք գնացել ենք Վարդահովիտ, որտեղ «Գեոմայնինգ» ընկերությունը ոսկու մետաղական հանքերի հետազոտություն պետք է կատարեր։ Լսումները հատուկ, գաղտնի կերպով տարել էին մի բնակավայր, որտեղ այդ սեզոնին բնակիչներից մոտ 100 հոգի է ապրում։ Այդ քննարկումը կանխվել է։ Դա Եղեգիս գետի ջրհավաք ավազանն է։ Ո՞նց եք հանք բացում»։
Ըստ վարչական շրջանի ղեկավարի, հանրային լսումներին բոլորը դեմ են արտահայտվել մտավախություն ունեին հանքի վնասների հետ կապված։