Home / Կրթություն / Մատենադարանի ապօրինի ղեկավարությունը շարունակում է իր տեղում մնալ

Մատենադարանի ապօրինի ղեկավարությունը շարունակում է իր տեղում մնալ

Երևանի ընդհանուր իրավասության դատարանում այսօր հերթական անգամ հետաձգվեց Մատենադարանի արհմիության բողոքի մասին որոշում կայացնելը։ Բողոքը դատարանում է գտնվում ս. թ. ապրիլ ամսից։ Հիշեցնեմ` Մատենադարանի աշխատողների արհմիությունը Մատենադարանի կառավարման մարմինների ընտրությունների և կանոնադրության փոփոխության անիրավաչափության մասին դիմում է ներկայացրել ՀՀ վարչապետ Նիկոլ Փաշինյան-ին, ՀՀ կրթության, գիտության, մշակույթի և սպորտի նախարարություն, ՀՀ դատախազություն և Մատենադարանի Հոգաբարձուների խորհրդի նախագահ Լևոն Աբրահամյանին։

2018 թ. փետրվարի 19-ին Մատենադարանի Հոգաբարձուների խորհրդի բոլոր 19 անդամները միաձայն խորհրդի նախագահ են ընտրել Լևոն Ազատի Սարգսյանին։ Վերոնշյալ նիստի արձանագրությունը, սակայն, ստորագրել են միայն Խորհրդի նախագահ Լևոն Սարգսյանը և քարտուղարը։ Հիմնադրամների մասին 28.1 հոդվածի և Մատենադարանի Կանոնադրության 41-րդ հոդվածի համաձայն` Խորհրդի նիստերի արձանագրությունները ենթակա են ստորագրման Խորհրդի նախագահի և տվյալ նիստին մասնակցող Խորհրդի բոլոր անդամների կողմից։

2018 թ. մարտի 6-ին տեղի է ունեցել Մատենադարանի տնօրենի ընտրություն։ Խորհրդի բոլոր 19 անդամների կողմից միաձայն տնօրեն է ընտրվել միակ թեկնածու Վ. Տեր-Ղևոնդյանը։ Այս նիստի արձանագրությունը ևս ստորագրվել է Խորհրդի նախագահ Լ. Սարգսյանի և քարտուղարի կողմից։ Այս արձանագրությամբ ևս թույլ է տրվել Կանոնադրության 41-րդ հոդվածի և Հիմնադրամների մասին օրենքի իմպերատիվ խախտում։

Հեղափոխությունից հետո` 2018 թվականի հուլիսի 27-ին, հրավիրված Հոգաբարձուների խորհրդի արտահերթ նիստին, ըստ արձանագրության, մասնակցել են Խորհրդի թվով 13 անդամներ, բացակա են եղել նախագահ Լևոն Սարգսյանը և Արամ Սիմոնյանը, ի պաշտոնե ազատված են եղել Լ. Մկրտչյանը, Վ. Ստեփանյանը, Ա. Բերբերյանը և Ն. Տեր-Վարդանյանը: Խորհուրդը, նկատի ունենալով երկրում տեղի ունեցած «քաղաքական փոփոխությունները և հայտնի իրադարձությունները», քննարկել է Մատենադարանի Կանոնադրության փոփոխման հարցը։ Ի տարբերություն նախկին երկու արձանագրությունների, որոնք ստորագրվել էին միայն Խորհրդի նախագահի և քարտուղարի կողմից, այս մեկը ստորագրվել է նաև Խորհրդի անդամների կողմից, բայց ոչ բոլորի:

Կանոնադրության փոփոխություն հնարավոր է իրականացնել Խորհրդի անդամների ընդհանուր թվի ձայների որակյալ մեծամասնությամբ՝ 2/3-ով: Նկատի ունենալով, որ հիշյալ նիստին՝ ըստ արձանագրության, մասնակցել են 19-ից միայն 13 անդամ, Կանոնադրությունում հնարավոր կլիներ փոփոխություն մտցնել, եթե մասնակից բոլոր 13 անդամները քվեարկեին դրա օգտին:

Սակայն նիստի արձանագրության պատճենից ակնհայտ է, որ 13-ի փոխարեն արձանագրությունը ստորագրել են միայն 10-ը։

Կանոնադրության վերոնշյալ փոփոխությունը գրանցվել է ՀՀ ԱՆ իրավաբանական անձանց պետական ռեգիստրում, որի համար Մատենադարանի տնօրինության կողմից ներկայացվել են «համապատասխան» փաստաթղթեր: Նշված փաստաթղթերի ուսումնասիրությամբ պարզվել է, որ Կանոնադրությունում փոփոխություն կատարելու հիմք հանդիսացել է ոչ թե Հոգաբարձուների խորհրդի 2018 թվականի հուլիսի 27-ի արտահերթ նիստի արձանագրությունը, այլ դրանից կատարված քաղվածքը, որը ստորագրվել է Մատենադրանի տնօրենի կողմից: Հիշյալ քաղվածքի համաձայն՝ Հոգաբարձուների խորհրդի վերոնշյալ արտահերթ նիստի արձանագրությունը ստորագրել են նիստին մասնակցած բոլոր 13 անդամները:

Այսինքն ստացվում է, որ ՀՀ ԱՆ իրավաբանական անձանց պետական ռեգիստր Հոգաբարձուների խորհրդի 2018 թվականի հուլիսի 27-ի արտահերթ նիստի արձանագրության փոխարեն ներկայացվել է ինչ-որ քաղվածք, ավելին` ապօրինաբար և ակնհայտ ՀՀ ԱՆ իրավաբանական անձանց պետական ռեգիստր է ներկայացվել սխալ տեղեկատվություն՝ հայտնելով թե իբրև Խորհրդի նիստի արձանագրությունը ստորագրել են նիստին մասնակցած բոլոր անդամները, այնինչ՝ Թիվ 6 արձանագրությունից հստակ երևում է, որ նիստին մասնակցած 13 անձանցից ստորագրել են միայն 10 հոգին։ ՀՀ ԱՆ իրավաբանական անձանց պետական ռեգիստրը, հիմք ընդունելով այդ տեղեկատվությունը, կատարել է համապատասխան փոփոխությունը։

Մատենադարանի Հոգաբարձուների խորհուրդը մինչ օրս գործում է փակ, ոչ մասնակցային, ոչ դեմոկրատական սկզբունքներով։ Կանոնադրությունը չի կարգավորում ինստիտուտի աշխատակիցների մասնակցությունը Խորհրդի կազմի ընտրությանը։ Հոգաբարձուների խորհրդի Մատենադարանից ներկայացված անդամները Խորհրդում են հայտնվել «տնօրինության որոշմամբ»։

Գայանե Այվազյան, Մատենադարանի գիտաշխատող
աղբյուր՝ ֆեյսբուքի էջ