Epress.am Լուրեր Հայաստանից
Պատերազմից կես տարի անց կան զոհված զինծառայողների մարմիններ, որոնք դեռևս չեն նույնականացնել։
Առողջապահության նախարարն ավելի վաղ նշել էր, որ խոսքը մոտ 210 փորձանմուշների մասին է, որոնց հետ «շատ բարդ է աշխատել»։
Մասունքների մի մասը այնքան են վնասված, որ մի քանի անգամ փորձաքննության ենթարկվելուց հետո՝ միևնույնն է չեն նույնականացվել։ Նախարարությունից հայտնել են, որ մտադիր են այդ նմուշներն ուղարկել արտերկիր՝ նոր փորձաքննության։
Տասը օր առաջ վարչապետ Նիկոլ Փաշինյանը հայտարարել էր, որ մարտի 20-ի դրությամբ հայկական կողմն ունի պաշտոնապես հաստատված 3250 զոհ, որոնցից 189-ը՝ դեռևս չնույնականացված։
Կա նաև անհետ կորածների ծավալուն ցուցակ։ Քանի հոգի է համարվում անհետ կորած՝ պաշտոնյաները չեն նշում։ Փաշինյանը հավաստիացնում է, որ ցուցակը դեռ պետք է ճշգրտվի, բայց «զոհերի թիվը 4000-ից չի անցնի»:
Ղարաբաղում՝ Ադրբեջանի վերահսկողության տակ անցած տարածքներում, շարունակվում են նաև որոնողական աշխատանքները․ առ այսօր հայտնաբերվել կամ հայկական կողմին է փոխանցվել 1524 աճյուն։