Epress.am Լուրեր Հայաստանից
«Նախախորհրդարան» շարժման քարտուղարության անդամ Ալեք Ենիգոմշյանի նկատմամբ ոստիկանների գործողությունների իրավաչափությունը քննելու համար ՀՀ ոստիկանապետ Վլադիմիր Գասպարյանի հրամանով սկսվել է ծառայողական քննություն: Այս մասին այսօր Epress.am-ին հայտնել է Ոստիկանության հասարակայնության հետ կապերի և լրատվության վարչության բաժնի աշխատակից Արմեն Մալխասյանը:
«Նախախորհրդարանը» երեկ տարածած հաղորդագրության մեջ բարձրաձայնել էր Ենիգոմշյանի նկատմամբ «ոստիկանների ցուցաբերած անմարդկային վերաբերմունքի մասին»:
«Ալեք Ենիգոմշյանը «100-ամյակը առանց ռեժիմի» իրազեկման ավտոերթի ավարտից հետո Ալեք Մանուկյանի վրա գտնվող «Նախախորհրդարանի» գրասենյակից իր հարևան Վահրամ Գաբրիելյանի հետ միասին՝ վերջինիս ավտոմեքենայով, տուն վերադառնալիս է լինում, երբ Սայաթ-Նովա փողոցի վրա՝ Ֆրանսիայի հրապարակի հարակից հատվածում, նրանց ավտոմեքենային են մոտենում մի խումբ անձինք՝ ներկայանալով որպես Ոստիկանության քրեական հետախուզության բաժնի աշխատակիցներ: Նրանք Ալեք Ենիգոմշյանին կոպտորեն քաշքշելով դուրս են հանել ավտոմեքենայից, իսկ հարևանին բերման ենթարկել՝ մեքենայի հետ միասին: Չնայած այն հանգամանքին, որ Ալեք Ենիգոմշյանը մի քանի անգամ կրկնել է, որ կույր է, չի տեսնում, ոստիկանության աշխատակիցները նրան թողել են փողոցի բանուկ հատվածում և հեռացել՝ իրենց հետ տանելով հարևանին և վերջինիս ավտոմեքենան: Որոշ ժամանակ անց պատահական անցորդներ մոտեցել են Ալեք Ենիգոմշյանին և դուրս բերել փողոցի բանուկ հատվածից»,- ասված է «Նախախորհրդարանի» հայտարարության մեջ:
Ինչ վերաբերում է Գաբրիելյանին, ապա նրա հարցով Արտաշատ քաղաքի քննչական բաժնում նյութեր են նախապատրաստվում: Epress.am-ի հետ զրույցում ՀՀ քննչական կոմիտեի ղեկավարի խորհրդական Սոնա Տռուզյանը նշել է Գաբրիելյանին բերման ենթարկելու պաշտոնական պատճառը։ Գաբրիելյանը, Շահումյան գյուղի կենտրոնական ճանապարհի վրա վիճաբանելով ավտոմեքենան կանգնեցրած ոստիկանի հետ, հայհոյել է նրան և հարվածել: Դեպքից հետո Գաբրիելյանը բերման է ենթարկվել ոստիկանության Արտաշատի բաժին, բացատրություն գրել և ազատ արձակվել հոկտեմբերի 20-ին, ժամը 02։00-ի սահմաններում: Ոստիկանին տրվել է դատաբժշկի ուղեգիր:
Լուսանկարը՝ wikipedia.org
