Epress.am Լուրեր Հայաստանից
ՀՀ կառավարության շենքի դիմացի մայթին բացօթյա առևտրի արգելքի դեմ բողքողների ակցիայի ընթացքում բավական լարված իրավիճակ է ստեղծվել:
Ինչպես հաղորդում է Epress.am-ի թղթակիցը, ոստիկանները կոպտորեն հրում էին ՀՀ ԱԺ պատգամավորներ Արմեն Մարտիրոսյանին, Զարուհի Փոստանջյանին և Անահիտ Բախշյանին, ինչպես նաև ակցիայի մասնակիցներին: Ոստիկանները նաև ուժեղ հարվածում էին պատգամավորներին, մասնավորապես, Զարուհի Փոստանջյանին, գործը հասնում էր անգամ ոտքով և բռունցքով հարվածների: Այդ ընթացքում Անահիտ Բախշյանը իրեն վատ է զգացել, սկսել է լացել, մարդիկ շտապ օգնության մեքենա են կանչել և պատգամավորին տեղափոխել են մեքենայի մեջ:
Ոստիկանական գործողությունների ղեկավարներից մեկը, դիմելով Արմեն Մարտիրոսյանին, ասել է. «Գնա նիստերիդ մասնակցի»: Հիշեցնենք, որ «Ժառանգություն» կուսակցությունը բոյկոտում է ԱԺ նիստերի ընթացիկ քառօրյան:
Ակցիայի վայրում ներկա են եղել նաև հասարակական ակտիվիստներ Մարիամ Սուխուդյանը և Վարդգես Գասպարին: Վերջինիս հրելու ընթացքում նա սկսել է գոռալ` «խուլիգաններ, տականքներ», որից հետո ոստիկաններից մեկն այնպիսի ուժով է հրել Գասպարիին, որ վերջինս ընկել է: 6 ոստիկաններ նրան տեղափոխել են ոստիկանական մեքենա և տարել են ակցիայի վայրից:
Այդ իրադարձություններից հետո ոստիկանները մեծ արագությամբ լքել են ակցիայի վայրը: Բողոքավորներն ու ակտիվիստները գոռում էին նրանց հետևից. «Հրաման եք ստացել, դրա համար եք գնում»: Այնուհետև ակցիայի մասնակիցները կանգնել են մեկ գծով` ձեռքերում պահելով «Ճանաչիր իմ ատելու իրավունքը» գրությամբ պաստառը: