Հարցերին պատասխանելու փոխարեն՝ Գասպարիի գործով դատավորը լրագրողներին դիտողություն էր անում

«Երկու դատարանների որոշումները իրար հակասում են, սակայն դատավորը չի ցանկանում անգամ լսել ու պատասխանել մեր հարցերին»։ Այս մասին Շենգավիթ վարչական շրջանի ընդհանուր իրավասության դատարանում այսօր հայտարարել է ինժեներ, քաղաքացիական ակտիվիստ Վարդգես Գասպարիի փաստաբան Տիգրան Եգորյանն այն բանից հետո, երբ դատավոր Նելլի Բաղդասարյանը փաստաբանի հարցին պատասխանելու փոխարեն՝ մաստակ ծամելու համար դիտողություն է արել դահլիճում ներկա գտնվող լրագրողներին։

Գասպարիի փաստաբանը դատարանին խնդրել է պարզաբանել, թե ինչ կարգավիճակ ունի իր պաշտպանյալն այսօրվա դատական նիստի ընթացքում։ Եգորյանը հիշեցրել է, որ երկու նիստ առաջ Գասպարիի նկատմամբ սանկցիա էր կիրառվել և նա հեռացվել էր դահլիճից 6 ժամով։

«Մենք ուզում ենք հասկանալ՝ արդյոք դա 6 դատական ժամ էր, թե ուղղակի 6 ժամ։ Եվ այդ որոշումը վերացել է, թե ոչ։ Եթե ոչ, ապա Գասպարին չի՞ խախտում օրենքը՝ գտնվելով նիստերի դահլիճում», ֊ հայտարարել է Եգորյանը։

Փաստաբանը հիշեցրել է նաև, որ երբ ավելի վաղ նույն գործի շրջանակներում դատավոր Ռուզաննա Հակոբյանի կողմից Գասպարին 36 ժամով հեռացվել էր դատական նիստերի դահլիճից, իրենց պարզաբանել էին, որ այդ 36֊ը դատական ժամեր են, և Գասպարին իրավունք չունի ներկա գտնվելու նիստերին։ Փաստորեն, ըստ Եգորյանի, երկու դատավորների որոշումներն իրար հակասում են։

Ի պատասխան՝ Բաղդասարյանը նշել է, որ Եգորյանը զբաղվում է «դեմագոգիայով»։

Վերջինս դատավորի խոսքն անհարգալից է համարել և Բաղդասարյանին խնդրել է պարզաբանումներ տալ։ Դատավորի և փաստաբանի երկխոսությանը միջամտել է Գասպարին՝ ասելով, որ իր բողոքն է արտահայտում դատարանի գործողությունների հանդեպ, և պառկել է դատարանի դահլիճում։

«Իմ նկատմամբ քրեակատարողական հիմնարկում կիրառվել են դաժան խոշտանգումներ, և ես անկեղծորեն ասում եմ՝ քրեական հեղինակությունների դեմ ես անզոր եմ։ Ինձ ուրիշ բան չի մնում, քան հիմա պառկել։ Ձեր դատարանների անմիջական ցուցումներով են ընթացել իմ նկատմամբ կտտանքները, և դուք ուշադրություն չեք դարձնում։ Հույս ունեմ՝ ձեր ենթականերին չեք ասի, որ ինձ հիմա այս լուսավոր դահլիճում խոշտանգեն», – հայտարարել է Գասպարին։

Նելլի Բաղդասարյանը որոշում է ընդունել դատական սանկցիա կիրառել՝ Գասպարիին վեց ժամով հեռացնելով նիստերի դահլիճից: Բաղդասարյանն այս դեպքում էլ, սակայն, չի ասել թե ինչպիսի 6 ժամվա մասին է խոսքը։

Եգորյանը հեռացել է նիստերի դահլիճից՝ պատճառաբանելով, որ առանց իր պաշտպանյալի ինքը դատական նիստին չի կարող մասնակցել։ Բաղդասարյանը ասել է, որ դիմելու է Փաստաբանների պալատ՝ Եգորյանի նկատմամբ կարգապահական տույժ կիրառելու հարցով։

Նշենք, որ Գասպարին մեղադրվում է վարչական գործով նշանակված դատական նիստի ժամանակ դատավարությանը մասնակցող հայցվորի ներկայացուցիչներ` ՀՀ Ոստիկանության ծառայողներ Դիանա Վարդանյանի, Սոնա Մելիքյանի և դատական նիստը նախագահող դատավոր Ռուզաննա Հակոբյանի հասցեին վիրավորական արտահայտություններ հնչեցնելու մեջ: