Epress.am Լուրեր Հայաստանից
Մեր երկրում չես կարող ներքին համոզմունքների, փիլիսոփայական հայացքների, աշխարհայացքի, խղճի թելադրանքի հետ կապված հրաժարվես պարտադիր զինվորական ծառայությունից: Այս մասին այսօր «Նոր սերունդ» հասարակական կազմակերպության կազմակերպված «Այլընտրանքային ծառայության մասին» ՀՀ օրենքի վերաբերյալ քննարկման ժամանակ ասել է իրավապաշտպան Արթուր Սաքունցը:
«Ճիշտ է՝ 2004-2013 թվականներն ընկած ժամանակահատվածի համեմատ ինչ-որ փոփոխություններ կան այլընտրանքային զինվորական ծառայության հետ կապված, օրինակ, Եհովայի վկաներին իրավունք է տրվում օգտվել այլընտրանքային ծառայությունից: Սակայն հիմա էլ չի լուծվել մի կարևոր բան. եթե դու բանակում ես ու ընթացքում ցանկանում ես դիմում գրել, որ չես ուզում ծառայել, թույլ չեն տալիս: Այսինքն՝ մարդը չի կարող երկու տարվա ընթացքում իր համոզմունքները փոխել: Բայց սա ակնհայտորեն խախտում է: Զինվորական ծառայությունը պետք է ընտրովի լինի՝ որպես մասնագիտություն: Քաղաքացին երկրի նկատմամաբ միայն մի պարտավորություն ունի՝ հարկեր վճարել, իսկ ծառայելու հարցն ինքը պետք է որոշի», – ասել է իրավապաշտպանը:
Նա հիշեցրել է նաև, որ Հայ առաքելական եկեղեցու սպասավորները անհասկանալի կերպով առավել շատ արտոնություններ ունեն բանակում: Նրանք ծառայության ընթացքում նաև աշխատավարձ են ստանում՝ այն հիմնավորմամբ, որ հոգևոր ծառայություն են անում:
«Սակայն անհասկանալի է, թե որտեղից և ինչու այդ գումարը պետք է տալ նրանց և ոչ թե, ասենք, բողոքական եկեղեցու հետևորդի: Բացի դրանից, չպետք է մոռնալ, որ մենք աշխարհիկ և ոչ թե հոգևոր պետություն ենք», – ասել է Սաքունցը:
Քննարկման ժամանակ իրավապաշտպանն անդրադարձել է նաև մեկ այլ խնդրի՝ կապված միջնակարգ դպրոցներում դասավանդվող «Ռազմագիտության» առարկայի դասագրքերի հետ: Ըստ բանախոսի՝ դասագրքերում մի քանի էջերով կան տարբեր տեսակի զենքերի, այդ թվում նաև քիմիական զենքի մանրամասն նկարագրություններ:
Դրանց փոխարեն, Սաքունցի խոսքով, պետք է անդրադառնալ զինվորական ծառայության իրավունքների հետ կապված հարցերին, որոնք սակայն այսօրվա դասագրքերում բացակայում են: Բացի դա, նա նշել է, որ քիմիական զենքի օգտագործուման մանրամասները զինվորական մասնագիտական խնդիր են և ոչ թե ուսումնական: