«Սասնա ծռեր» խմբի անդամին տեղափոխել են անմարդկային պայմաններով խուց․ փաստաբան

«Սասնա ծռեր» խմբի անդամ Աշոտ Պետրոսյանին խոշտանգում են «Նուբարաշեն» քրեակատարողական հիմնարկում՝ նրան պահելով նվազագույն պայմաններից զուրկ խցում։

Այս մասին այսօր հայտարարել է Պետրոսյանի պաշտպան, «Հելսինկյան ասոցիացիա» իրավապաշտպան կազմակերպության փաստաբան Արայիկ Պապիկյանը։

Փաստաբանը դիմում֊բողոք է ներկայացրել «Նուբարաշեն» ՔԿՀ և Քրեակատարողական վարչություն, որում նշել է, որ փետրվարի 16-ից 20-ը հայտարարած հացադուլից հետո Աշոտ Պետրոսյանին տեղափոխել են մի խուց, որը զուրկ է տարրական պայմաններից։

«Խցում ջուր չկա, պատուհանի ապակիներից մեկը ջարդված է, գիշերը խցի ներսում չափազանց ցուրտ է եղել: Պատուհանի ճեղքերը փակելու նպատակով կալանավորները դրանք փակել են իրենց ձեռքի տակ եղած տարբեր իրերով: Օրվա [փետրվարի 21-ի] ընթացքում մեկ անգամ ջուր է եղել, այն էլ՝ մի քանի կաթիլ: Խցի մյուս պայմանները «համահունչ են» վերը ներկայացված պայմաններին»,- ասված է Արայիկ Պապիկյանի հրապարակած դիմում֊բողոքի մեջ:

Պաշտպանը նշել է, որ այս գործողությունների մեջ ինքն իր պաշտպանյալին խոշտանգելու միտում է տեսնում և պահանջել հրատապ միջոցներ ձեռնարկել Աշոտ Պետրոսյանի նկատմամբ ցուցաբերվող անմարդկային և արժանապատվությունը նվաստացնող վերաբերմունքը վերացնելու և կալանավորված անձի համար օրենքով սահմանված բոլոր պայմաններն ապահովելու համար։

Աշոտ Պետրոսյանը փետրվարի 16-20-ը հացադուլ էր հայտարարել՝ ի աջակցություն «Սասնա ծռեր» խմբին օժանդակելու մեջ մեղադրվող, որպես «Հաց բերող» հայտնի Արթուր Սարգսյանի։

Արթուր Սարգսյանին ազատ արձակելու պահանջով արդեն մոտ մեկ շաբաթ հացադուլ է հայտարարել նաև «Սասնա ծռեր» խմբի անդամ Արայիկ Խանդոյանը։

Epress.am-ի հետ զրույցում Խանդոյանի պաշտպան Արայիկ Պապիկյանը նշել է, որ երեկ է հանդիպել Խանդոյանին և վերջինս չի բողոքել իր ինքնազգացողությունից, միայն ճնշումն է բարձր եղել, իսկ երիկամի ցավերի ու գլխացավերի վերաբերյալ ասել է, որ դա իր համար արդեն նորմալ է։

Հիշեցնենք, որ Արթուր Սարգսյանը հացադուլով է արձագանքել իրեն երկրորդ անգամ կալանավորելու Հատուկ քննչական ծառայության որոշմանը։ Նա հացադուլի մեջ է կալանավորման օրվանից՝ փետրվարի 9-ից։ Ի համերաշխություն Սարգսյանի բողոքի ակցիա է անցկացվել նաև բանտից դուրս։ Երևանում փետրվարի 14֊ին բողոքի երթ է կազմակերպվել։ Դրա մասնակիցները մտահոգված են, որ հացադուլը շատ վտանգավոր կարող է լինել Արթուր Սարգսյանի առողջության համար, քանի որ վերջինս արդեն իսկ տառապում է ծանր հիվանդություններով, և դրանց հիմքով էլ ստորագրությամբ ազատ էր արձակվել դեկտեմբերի 31-ին շուրջ 5 ամիս կալանավայրում անցկացնելուց հետո։