Home / Շուկա / Նարկոբիզնեսը սովորեցրեց հարուստներին՝ ինչպես թաքցնել փողերը հարկային դրախտում

Նարկոբիզնեսը սովորեցրեց հարուստներին՝ ինչպես թաքցնել փողերը հարկային դրախտում

Օրինական կապիտալիզմը հանցավոր կապիտալիզմից սովորել է, որ փողերի աշխարհում միայն օրինախախտներն են գոյատևում, անգլիական Guardian պարբերականի կայքում նոյեմբերի 18-ին հրապարակած իր հոդվածում գրում է իտալացի լրագրող Ռոբերտո Սավիանոն՝ անդրադառնալով օֆշորային գոտիներին վերաբերող սկանդալներին․

Ընդամենը 19 ամիս առաջ հրապարակվեցին Պանամական փաստաթղթերը: Այժմ էլ Դրախտային փաստաթղթերը գրավել են անգլիական և եվրոպական թերթերի առաջին էջերը: Երբ հրապարակվեցին Պանամական փաստաթղթերը, ես գրեցի, որ եթե դրանցում չլիներ Դեյվիդ Քեմերոնի, նորությունը, հավանաբար, նման ազդեցություն չէր ունենա: Այսօր ես մտածում, որ մենք նման կերպ չէին քննարկի Դրախտային փաստաթղթերը, եթե դրանցում չլիներ Եղիսաբեթ թագուհու անունը:

Երկու դեպքում էլ մենք տեսանք, որ [օֆշորներում փող լվանալու] մեխանիզմները նույնն են: Միայն խորհրդատվական ընկերությունների և կղզիների անուններն են փոխվել: Դրախտային փաստաթղթերում կա ամեն ինչից քիչ-քիչ՝ օրինական, չնայած բարոյական տեսանկյունից խնդրահարույց, օֆշորային ընկերությունների գրանցումից մինչև ցածր հարկային պարտավորություն ունեցող հոլդինգային ընկերություններ, որոնք, հնարավոր է, թաքցնում են հանցավոր սկզբնաղբյուր ունեցող ակտիվներ:

Հարկային դրախտն այն վայրն է, որտեղ հանցավոր կապիտալիզմը և օրինական կապիտալիզմը հանդիպում են և միավորվում:

Ես սա ավելի վաղ եմ ասել, բայց արժե կրկնել: Նաև պետք է նշել այն փաստը, որ մաֆիայի միավորումներն առաջինն են ստեղծել և դյուրացրել փողերի լվացման մեխանիզմները հարկային դրախտավայրերի միջոցով:

80-ականներին կոլումբիական Կալի հանցավոր կարտելի առաջնորդ Խիլբերտո Ռոդրիգես Օրեխուելան դարձավ Պանամայի Առաջին Միջամերիկյան բանկի խոշորագույն բաժնետերը: Կարտելը դա արեց, որպեսզի դյուրացնի թմրամիջոցների վաճառքից ստացված փողերի լվացումը և դրանց ներդրումը շրջանառության մեջ:

Անցյալ տարի հայտնի դարձավ, որ մեքսիկական նարկոբիզնեսի ղեկավարներից մեկը՝ Ռաֆայել Կարո Կինտերոն, օֆշորային ընկերություն ուներ Պանամայում։ Նրա կողքին ակտիվներ ունեին մի շարք եվրոպացի խոշոր գործարարներ և քաղաքական գործիչներ: Այդ ակտիվները տարբեր սկզբնաղբյուրներ ունեին՝ մի մասը օրինական, մյուս մասը՝ անօրինական, բայց բոլորն էլ օգտվում էին նույն ծառայություններից և վայելում նույն օգուտները:

Պանամա, Բերմուդներ, Սինգապուր, Կիպրոս, Մալթա՝ սրանք այն վայրերն են, որտեղ դու կարող ես գումարներ թաքցնել: Այս ցանցի կենտրոնում Լոնդոնն է:

Եվ այս ամենը միշտ չէ արվում օրինական ճանապարհով: Փաստն այն է, որ Պանամական փաստաթղթերի կարգի տեղեկատվության արտահոսքը հարված է որոշների իմիջին, բայց դրա հետևանքը նրանց բանտարկումը չէ:

Ինչպես երևում է, իմիջային կորուստները շատ քիչ վտանգ են պարունակում անդրազգային կորպորացիաների համար. օֆշորային ակտիվներ ունեցող հայտնի ընկերությունները ջրից չոր են դուրս գալիս:

Երբ մենք իմանում ենք, որ Microsoft-ի, Google-ի կամ Apple-ի կարգի ընկերությունները օֆշորային հաշիվներ ունեն և տեսնում ենք, որ դրանց իմիջը և բաժնետոմսերի գները չեն տուժում, դա բերում է նման ֆինանսական գործելաոճի լեգիտիմացմանը:

Դրա շնորհիվ ստացվում է, որ հարկեր վճարելը միայն նրանց համար է, ովքեր չեն կարող իրենց թույլ տալ չվճարել դրանք:

Հարկային տնտեսական քաղաքականության ինստիտուտի հետազոտությունը փաստում է, որ ամենաբարձր եկամտաբերությամբ ամերիկյան 500 ընկերություններից 366-ը օգտագործում են հարկային դրախտավայրերում գրանցված դուստր ընկերություններ՝ իրենց շահութահարկը նվազեցնելու նպատակով: Դրանց թվում են խոշոր բանկեր, ֆինանսական կազմակերպություններ, դեղագործական կորպորացիաներ, հագուստի և սննդի ոլորտում աշխատող հայտնի ընկերություններ:

Դրա արդյունքն այն է, որ Հռոմի արվարձանում բնակվող էլեկտրիկը կամ Լիվերպուլում փոքր բիզնեսի տեր մարդն ավելի լուրջ հարկային ճնշման տակ է գտնվում, քան հսկա ընկերությունները, որոնք անհամեմատ շատ փողեր են աշխատում:

Ռոբերտո Սավիանո

Փաստ է, որ չնայած Պանամական և Դրախտային փաստաթղթերի սկանդալների և տարբեր կառավարությունների (այդ թվում՝ Շվեյցարիայի և Ավստրիայի կարգի հարկային դրախտավայրերի) խոստումների պայքարել փողերի լվացման և հարկերից խուսափելու դեմ, ակտիվների չափը օֆշորային գոտիներում վերջին տարիներին միայն աճում է: Եվ դա պատահականություն չէ:

Ավելին՝ երբ որոշ դրախտավայրեր դուրս են մղվում (քաղաքական որոշմամբ կամ այն պատճառով, որ մամուլի ուշադրության կենտրոնում են հայտնվում), այնտեղ պահվող ակտիվները տեղափոխվում են նոր, ավելի վստահելի հարկային դրախտավայրեր:

Ես վստահ եմ, որ Պանամական և Դրախտային փաստաթղթերն այսբերգի երևացող մասն են միայն, և մենք պատկերացում էլ չունենք խնդրի իրական չափերի մասին:

Պանամական և Դրախտային փաստաթղթերի արտահոսքից մենք հասկացանք միայն, որ կոկաինի շրջանառությունից, հարկերից խուսափելուց ստացված փողերը և օրինական գումարները հարկային դրախտում միասին են ապրում՝ լեգիտիմացնելով միմյանց:

Օրինական կապիտալիզմը հանցավոր կապիտալիզմից սովորել է, որ փողերի աշխարհում միայն օրինախախտներն են գոյատևում: Նարկոբիզնեսով զբաղվողներն ազատ շուկայի այդ մոդելի առաջամարտիկներն էին, և այդ մոդելը հետզետե յուրացրեց նաև օրինական տնտեսությունը:

Կոկաինը միավորում է մերօրյա կապիտալիզմի բոլոր սյուները՝ արագություն, գլոբալիզացիա և տնտեսական ուժ: Այդ սինթեզը լավագույնս երևում է օֆշորային դրախտավայրերում: