Մասիսի նախկին քաղաքապետը պլստաց զանգվածային անկարգությունների մասով

Քննչական կոմիտեն դադարեցրել է Մասիսի նախկին քաղաքապետ Դավիթ Համբարձումյանի նկատմամբ քրեական հետապնդումը զանգվածային անկարգությունների մասով՝ հանցակազմի բացակայության պատճառով։

Գործը հարուցվել էր Երևանում և մարզերում խաղաղ հավաքներ և երթեր անցկացնող մի խումբ քաղաքացիների նկատմամբ խուլիգանական դրդումներով բռնություն գործադրելու դեպքերի առթիվ: Մասիսի քաղաքապետը անցած տարվա հուլիսին կալանավորվել էր, ապա սեպտեմբերին 5 միլիոն դրամ գրավի դիմաց ազատ արձակվել:

Դավիթ Համբարձումյանը շարունակում է մնալ մեղադրյալ՝ զենքի կամ որպես զենք օգտագործող առարկայի գործադրմամբ խուլիգանություն կատարելու հոդվածով:

Երեք ամիս առաջ Քննչական կոմիտեն հաղորդել էր Մասիսի քաղաքապետի և մյուսների գործով նախաքննության ավարտի մասին, սակայն Դատախազությունը ետ էր ուղարկել գործը՝ լրացուցիչ նախաքննության:

2018-ի համատարած անհնազանդության օրերին՝ ապրիլի 22-ին, Էրեբունի վարչական շրջանում տեղի ունեցած զանգվածային անկարգությունների դեպքի առթիվ քննվող քրեական գործով ձերբակալվել է Մասիսի քաղաքապետ Դավիթ Համբարձումյանը, փոխքաղաքապետ Կարեն Օհանյանը և ևս 3 անձ։