Ռուսաստանը հետ է քաշում զորքերն Ուկրաինայի հետ սահմանից:
Ուկրաինայի արևելյան սահմանների մոտակայքում և Ղրիմում կուտակված ռուսաստանցի զինծառայողները ստացել են մշտական տեղակայման հենակետներ վերադառնալու հրաման, հայտնել է երկրի պաշտպանության նախարար Սերգեյ Շոյգուն։
Ուկրաինայի նախագահ Վլադիմիր Զելենսկին թվիթերյան իր էջում գրել է, որ Ուկրաինան միշտ զգոն է, բայց ողջունում է «ցանկացած քայլ, որը կնպաստի Դոնբասում իրավիճակի կայունացմանը» և շնորհակալություն հայտնել միջազգային գոռծընկերներին՝ ցուցաբերած աջակցության համար։
The reduction of troops on our border proportionally reduces tension. 🇺🇦 is always vigilant, yet welcomes any steps to decrease the military presence & deescalate the situation in Donbas. Ukraine seeks peace. Grateful to international partners for their support #StrongerTogether
— Volodymyr Zelenskyy / Володимир Зеленський (@ZelenskyyUa) April 22, 2021
Հիշեցնենք՝ ապրիլի սկզբից Մոսկվան սկսել էր մեծածավալ զորքեր տեղակայել Ուկրաինայի հետ սահմաններին, ինչպես նաև 2014-ին Ռուսաստանին բռնակցված Ղրիմում։ Ռուսաստանի նախագահ Վլադիմիր Պուտինի մամուլի խոսնակ Դմիտրի Պեսկովը պնդել էր՝ «Ռուսական բանակը աշխարհի որևէ երկրի համար վտանգ չի ներկայացնում, և մեր զինվորական ուժերը իրենց ստորաբաժանումներով, տեղաշարժվում ու տեղակայվում են երկրով մեկ՝ ըստ Ռուսաստանի Զինված ուժերի հայեցողության»։
Ապրիլի 20-ին Զելենսկին Պուտինին առաջարկել էր հանդիպել Դոնբասի ցանկացած կետում, որտեղ պատերազմ է ընթանում։ Պուտինն ի պատասխան առաջարկել էր Զելենսկուն հանդիպել Մոսկվայում։
Նույն օրը ԵՄ արտաքին գործերի և անվտանգության քաղաքականության հարցերով բարձր ներկայացուցիչ, Եվրահանձնաժողովի փոխնախագահ Ժոսեպ Բորելը հայտարարել էր, որ ռուսական զորքերի թիվն Ուկրաինայի սահմաններին 100 000-ից ավելի է։