Լոնդոնում Ադրբեջանի դեսպանատան ներխուժումը Ալիևի դեմ էր

Մի խումբ անձիք ներխուժել են Լոնդոնում Ադրբեջանի դեսպանատուն, հանել պատշգամբից ադրբեջանական դրոշն ու ծածանել իրենցը (կապույտ գույնի արաբերեն գրվածքով)։ Ոստիկանությանը ավելի ուշ հաջողվել է ձերբակալել մոտ 23 հոգուց 8-ին։ 

Բողոքի ակցիան, ըստ Metro բրիտանական լրատվականի, ղեկավարել է «Մահդիի ծառաների միություն» (The Mahdi Servants Union) կոչվող խումբը: Այն Լոնդոնում հիմնված շիա մահմեդականների կազմակերպություն է, որի նպատակներից մեկը, ըստ նրանց կայքի, «Շիա քաղաքակրթության գերիշխանություն» հաստատելն է:

Խմբավորման առաջնորդ Յասեր Ալ-Հաբիբը հրահանգել է «հրատապ գործողություններ ձեռնարկել» Ադրբեջանի նախագահ Իլհամ Ալիևի դեմ, ասվում է «Մահդիի ծառաների միության» հայտարարության մեջ։ Միության անդամները վկայակոչել են Ադրբեջանի կառավարության կողմից երկրում որոշ շիա մահմեդականների նկատմամբ «հալածանքները»։ 

Ալ-Հաբիբը, ով Մեծ Բրիտանիայում ապաստան է ստացել Քուվեյթի իշխանությունների հետ կոնֆլիկտից հետո, Լոնդոնում մզկիթ է ղեկավարում։ 

Պաշտոնական Բաքուն «Մահդիի ծառաների միության» անդամներին անվանել է ռադիկալ կրոնականներ։ 

«Դեսպանատան շենք մտնելուց հետո ռադիկալ ​​կրոնական խմբավորման անդամները, վանդալիզմի գործողություններ կատարելով, բարձրացրել են կրոնական դրոշներ և շենքի պատշգամբում բղավել ռադիկալ ​​կրոնական կարգախոսներ։ Տեղի ոստիկանության միջամտությունից հետո խմբի անդամները դուրս են բերվել շենքից և կալանավորվել»,- ասվում է Ադրբեջանի արտգործնախարարության հայտարարության մեջ։ 

Նույն խմբավորման անդամները 2018թ․-ին հարձակվել էին նաև Լոնդոնում Իրանի դեսպանատան վրա։