Խոշտանգված Առաքելյանը, ըստ ՔԿ-ի, Skype-ով մարդ է հանվացրել

Հայ ազգային կոնգրեսի նախկին ակտիվիստ Տիգրան Առաքելյանը կալանավորվել է՝ մի խումբ անձանց կողմից, նախնական համաձայնությամբ, խոշոր չափերով շորթում կատարելու և դատավորին արատավորող տեղեկությունների հրապարակմանն օժանդակելու մեղադրանքով, հայտնում է Քննչական կոմիտեն:

Ավելի վաղ Առաքելյանը հայտարարել էր, որ Քննչական կոմիտեի երևանյան վարչության աշխատակիցները, այդ թվում՝ անձամբ Քննչականի պետ Արգիշտի Քյարամյանը, խոշտանգել են իրեն։ Թե՞ ինչու էին իրեն բերման ենթարկել՝ նախկին ակտիվիստը չէր ասել․ «Իմ առջև պահանջներ էին դրվում, որոնց մասին կարևոր է, որ հիմա չասվի»: Քննաչականից արդարացել էին՝ Առաքելյանը ձերբակալվել է, մեղադրյալի կարգավիճակ ունի, գտնվում է տնային կալանքի տակ, և առաջարկել էին ենթադրյալ խոշտանգումների մասին ոչ թե ֆեյսբուքյան լայվեր ձայնագրել, այլ դիմել իրավապահներին։

տե՛ս Խոշտանգված Առաքելյանի ծիտիկներ․ «Արգիշտի Քյարամյանը զղջացել է»

Դեպքից մոտ մեկ ամիս անց ՔԿ-ն հրապարակել է նախկին ակտիվիստաին առաջադրված մեղադրանքի բովանդակությունը։

Պաշտոնական վարկածի համաձայն, 2014 թվականին, նախնական համաձայնության գալով իրեն մտերիմ մի կնոջ հետ, Տիգրան Առաքելյանը Arpine Avagyan ֆեյսբուքյան ֆեյք-օգտահաշվով մտերմիկ, ջերմ հարաբերություններ է հաստատել մի տղամարդու հետ: Նրա հետ համագործակցող կինը այդ տղամարդու հետ Skype-ով «վարել է ինտիմ բնույթի զրույցներ, գայթակղել է նրան ու իր գործողություններով դրդել նրան մերկանալ տեսախցիկի առաջ», ինչը տեսագրվել է նախապես ներդրված ծրագրի միջոցով։

«Այնուհետև, 2015թ․ մայիսին, տղամարդն իր ֆեյսբուքյան էջին ստացել է Տիգրան Առաքելյանի կողմից Esmira Aliyeva անվամբ օգտատիրոջ էջով ուղարկված, իր ինտիմ զրույցի տեսագրությունը պարունակող Youtube-ի հղումը: Րոպեներ անց Առաքելյանը զանգահարել է տղամարդուն և վերջինիս ներկայացրել է 2 միլիոն 385 հազար 500 դրամին համարժեք 5000 ԱՄՆ դոլար գումար հանձնելու պահանջ՝ սպառնալով պահանջը չկատարելու դեպքում տեսանյութը տարածել համացանցում, ինչը մերժվել է տղամարդու կողմից», – շարունակել է Քննչական կոմիտեն։

Առաքելյանը, ըստ քննիչների, համագործակցել է նաև նախկին ոստիկան, այժմ բլոգեր Վարդան Ղուկասյանի («Դոգ») հետ։

«Քրեական վարույթով մեղադրյալ, «Հանրային ձայն» կուսակցության ղեկավար Արտակ Գալստյանի նկատմամբ որպես խափանման միջոց կալանք կիրառելու մասին միջնորդությունը Երևան քաղաքի առաջին ատյանի ընդհանուր իրավասության քրեական դատարանի դատավորի կողմից բավարարելուց հետո, կապված վերջինիս օրինական ծառայողական գործունեության հետ, նաև հետագայում Վարդան Ղուկասյանի համախոհների նկատմամբ հնարավոր ոչ ցանկալի դատական ակտերի կայացման վրա ազդեցություն գործադրելու նպատակով, [Առաքելյանը] համացանցից 2023 թ․ ապրիլին ներբեռնել է դատավորի լուսանկարը, համապատասխան ծրագրային հավելվածների միջոցով մոնտաժել այն, դրա վրա կատարել դատավորին վերաբերող անպարկեշտ արատավորող գրառումներ: Ապա լուսանկարն ուղարկել է Վարդան Ղուկասյանին, ով 2023 թ․ ապրիլի վերջին ուղիղ  հեռարձակմամբ, հրապարակային, բոլորին հասանելի youtube.com ինտերնետային կայքի միջոցով տեսաելույթի ընթացքում հրապարակել է դատավորին արատավորող տեղեկությունները»:

Կոմիտեից հավելել են՝ կան փաստական տվյալներ, որ Առաքելյանը օգնել է Վարդան Ղուկասյանին նաև արհեստականորեն բարձրացնել նրա տեսաելույթների և հրապարակած տեղեկատվության տեսանելիությունը, դիտումներ ապահովելու համար օգտագործել է ավտոմատացված ծրագրեր, ստեղծել ու վարել է ֆեյք օգահաշիվներ, տիրապետել է շորթումներ իրականացնելու համար հարմարեցված ծրագրերին։

Տիգրան Առաքելյանի նկատմամբ հարուցվել է քրեական հետապնդում, հունիսի 20-ին նրան մեղադրանք է ներկայացվել:

Առաջին ատյանի դատարանը մոտ մեկ ամիս առաջ նրա նկատմամբ այլընտրանքային խափանման միջոց է կիրառել։ Որոշումը բողոքարկվել է Վերաքննիչ դատարանում, որը Առաքելյանի նկատմամբ որպես խափանման միջոց է ընտրվել կալանքը։

Տիգրան Առաքլյանը ընդդիմադիր Հայ ազգային կոնգրեսի նախկին անդամ է, ժամանակին մասնակցում էր ՀԱԿ-ի գրեթե բոլոր ակցիաներին։ 2011-ին ձերբակալվել էր քաղաքական ատիվիզմի համար: 2012 թվականի հուլիսին  6 տարվա ազատազրկման էր դատապարտվել խուլիգանության մեղադրանքով, 10 ամիս անց համաներմամբ ազատ արձակվել։ 2015-ին նա մեղադրվել է ՀՀԿ-ական պատգամավոր Հովհաննես Սահակյանին սեքսուալ բնույթի տեսանյութերով շանտաժի ենթարկելու համար, մեղադրանքը չի ընդունել։