Եգիպտոսի իշխանությունները զորքեր են դուրս բերել Պորտ Սաիդ քաղաք այն բանից հետո, երբ ֆուտբոլային հանդիպմանը հաջորդած բախումների հետևանքով 74 մարդ է զոհվել: ՖԻՖԱ-ի նախագահ Յոզեֆ Բլատերը այս միջադեպն անվանել է «սև օր» սպորտի պատմության մեջ:
Միջադեպը ծագել է տեղական «Ալ-Մասրի» և Կահիրեի «Ալ-Ախլի» ակումբների միջև երեկվա հանդիպումից հետո: Տանտերերը 3:1 հաշվով հաղթանակ են տարել մայրաքաղաքային ակումբի նկատմամբ:
Ականատեսների խոսքով` մարզադաշտում մթնոլորտը սկսել է շիկանալ այն բանից հետո, երբ մայրաքաղաքի ակումբի երկրպագուները վիրավորական բովանդակությամբ պաստառ են բարձրացրել:
Մրցավարի եզրափակիչ սուլոցից հետո «Ալ Մասրի» ակումբի երկրպագուները դուրս են եկել դաշտ և հարձակվել պարտված թիմի և նրա երկրպագուների վրա: Ականտեսների վկայությամբ` նրանցից ոմանք զինված են եղել դանակներով:
«Սա ֆուտբոլ չէ, սա պատերազմ է, և մեր աչքի առջև մարդիկ են մահանում»,- ասել էր «Ալ Ախլի» ակումբի ֆուտբոլիստներից մեկը:
Այժմ եգիպտական զորքերը հսկում են քաղաքը` թույլ չտալու համար հետագա բախումներ թիմերի երկրպագուների միջև:
Երկրի առողջապահության նախարարի տեղակալի խոսքով` բացի զոհերից հարյուրավոր մարդիկ վնասվածք են ստացել: Առնվազն երկու ֆուտբոլիստներ թեթև վնասվածքներ ուներ:
Պաշտոնյայի վկայությամբ` այս իրադարձությունն ամենալուրջ միջադեպն է եգիպտական ֆուտբոլի ողջ պատմության ընթացքում:
Եգիպտոսի Ներքին Գործերի նախարարը նշել է, որ բախումների արդյունքում 47 մարդ է ձերբակալվել է:
Պորտ Սաիդի բնակիչները վաղ առավոտյան երթ են կազմակերպել`հայտարարելով, որ միջադեպը ռազմական և ոստիկանական ուժերի դավադրության արդյունք էր, որը երկրում քաոս տարածելու նպատակ ուներ:
Լարվածությունը տարածվել է նաև մոտակա Սուեզ գավառում: Այստեղ մոտ 500 մարդիկ, այդ թվում` ֆուտբոլի երկրպագուներ և ակտիվիստներ, հավաքվել են գլխավոր ոստիկանական բաժնի առջև` բողոքելով ոստիկանական անփութության դեմ:
«Ալ Ջազիրա» հեռուստաընկերությունը նշում է, որ «Ալ Մասրի» և «Ալ –Ահլի» թիմերի երկպրագուների միջև բախումներն ու արյունոտ ելքերը երկարամյա պատմություն ունեն, որոնք ավելի են հաճախակիացել վերջին տարիների ընթացքում: