Epress.am Լուրեր Հայաստանից
Համաշխարհային հռչակ վայելող ռեժիսոր Ֆրենսիս Ֆորդ Կոպոլան իր նոր «Մեջտեղում» ֆիլմը ներկայացնելու նպատակով օրերս Մոսկվա կատարած այցի ժամանակ խոսել է նաև նորընտիր նախագահ Վլադիմիր Պուտինի և ռազմական դրության մեջ գտնվող Սիրիայի նախագահ Բաշար Ասադի մասին:
«Ես հանդիպել եմ Պուտինի հետ, մենք նրա հետ ինտիմ մթնոլորտում ընթրել ենք, և նա ակնհայտորեն շատ խելացի երիտասարդ է: Նա ազդեցիկ անձ է:
Ռուսաստանում սեփականաշնորհման 15 մութ տարիներ էին, ոչ թե մութ, այլ անգամ քրեական: Իսկ Պուտինը հայտնվեց և կարողացավ ինչ-որ կայունություն մտցնել իր ունակությունների գիտելիքների և խելքի շնորհիվ: Եվ նա բավականաչափ խելացի է, որպեսզի հասկանա, որ ինչ-որ պահի հեռանալ է պետք: Երբ ընդդիմությունն ու մտավորականությունը կարողանան որևէ խելքին մոտ բան առաջարկել, Պուտինը վերջիվերջո կհեռանա: Ինձ թվում է, որ նա հանուն իշխանության պահպանման չի կարողանա իսկական բռնություն կիրառաել ազգի դեմ:
Չնայած, մյուս կողմից, ես երեք տարի առաջ Սիրիայում էի և հանդիպեցի Ասադի և նրա կնոջ հետ: Նրանք իմ ճանաչած ամենահաճելի և գիտակ զույգերից են: Իսկ հիմա լսում եմ, թե ինչ է տեղի ունենում Սիրիայում…Կամ Ասադն իր հոր կողմից կառուցված ընտանիքի և բանակի պատանդն է, կամ նա երկերեսանի է: Եվ եթե ամեն ինչ հենց այդպես է, ապա իմ ինտուիցիան ինձ դավաճանել է:
Ինձ թվում է, որ Ռուսաստանի նախագահը բավական խելացի մարդ է, և նա ամեն ինչ հասկանում է, եթե ինչպես հարկ է բացատրեն: Բայց ինչպես Ասադի դեպքում, ես կարող եմ և սխալ լինել: Երբեմն դաժան մարդիկ կարող են իշխանությունը պահպանել միայն որովհետև դաժան են: Բավական է միայն նայել Ռուսաստանի պատմությանը»,- ասել է ռեժիսորը: