ԱԺ-ն ընդունեց կամավորագրված և զորակոչված անձանց աշխատատեղերին ու ստաժին վերաբերող նախագիծը

Խորհրդարանն արտահերթ նիստում առաջին ընթերցմամբ ընդունեց «Իմ քայլը» խմբակցության ներկայացրած Աշխատանքային օրենսգրքում փոփոխություններ կատարելու նախագիծը, ըստ որի՝ կամավորագրված, զորագրված անձանց աշխատատեղը պահպանվելու է, իսկ տվյալ ժամանակահատվածի համար հաշվարկվելու է աշխատանքային ստաժ:

Իշխող խմբակցության պատգամավոր Հերիքնազ Տիգրանյանը, ներկայացնելով նախագիծն, ասաց, որ այն «միտված է զինվորական ծառայության բոլոր տեսակների հետ կապված հարաբերությունները կարգավորելուն, որը առաջանում է աշխատողի և գործատուի միջև` կախված աշխատողին զինվորական ծառայության զորակոչելու դեպքերի հետ»։ Առաջարկվում է սահմանել, որ զորակոչված քաղաքացիների աշխատատեղը պահպանվում է, այդ ժամանակահատվածի համար աշխատողը ազատվում է աշխատանքային պարտականությունների կատարումից, իսկ վարձատրության հարաբերությունները կարգավորվում են կողմերի համաձայնությամբ:  Առաջարկվում է նաև, որ զինվորագրված աշխատող անձանց համար այդ ժամանակահատվածը դիտարկվի որպես աշխատանքային ստաժ:

«Լուսավոր Հայաստան» խմբակցության պատգամավոր Անի Սամսոնյանը ողջունեց նախագիծը, սակայն ընդգծեց` հարցին մյուս կողմից էլ պետք է նայել, քանի որ կամավորագրված կամ զորակոչված քաղաքացու աշխատատեղի պահպանումը կարող է խնդիր առաջացնել գործատուի համար` նրա աշխատանքի արդյունավետության տեսանկյունից: Գործատուի համար, արձագանքեց Հերիքնազ Տիգրանյանը, չկա որևէ արգելք փոխարինող աշխատողի ընդունելու հետ կապված` մինչև իր հիմնական աշխատակցի վերադառնալը:

«Իմ քայլը» խմբակցության պատգամավոր Գայանե Աբրահամյանը հետաքրքրվեց, թե զինվորագրված կամ կամավորագրված աշխատողի գործատուն արդյոք պարտավոր է վճարել վերջինիս այդ ժամանակահատվածի համար:

«Ուզում եմ հստակեցնել, որ «Զինվորական ծառայության և զինծառայողի կարգավիճակի մասին» օրենքով արդեն իսկ սահմանված են զինվորական վարժանքների և զորավարժությունների դեպքում վճարման պարտականությունները: Այս դեպքում մենք սահմանում ենք լրացուցիչ երաշխիք, եթե գործատուն կկամենա և աշխատողի հետ եթե կգան համաձայնության, կամ կոլեկտիվ պայմանագրով նախատեսված կլինի, որ զորահավաքային զինծառայության կամ կամավորագրվելու դեպքում վճարում է գործատուն, ապա նա կվճարի, սա լրացուցիչ երաշխիք է», – պատասխանեց Տիգրանյանը: Նա կրկբեց` Զինվորական ծառայության և զինծառայողի կարգավիճակի մասին օրենքի համաձայն` զորակոչված անձինք արդեն իսկ հավասարեցվում են զինծառայողի կարգավիճակին և պետությունից ստանում վարձատրություն:

Առաջարկվող հոդվածներում տեղ գտած փոփոխություններն ունենալու են հետադարձ ուժ. դրույթները տարածվելու են սեպտեմբերի 27-ից ծագած իրավահարաբերությունների վրա:

Քաղաքական մեծամասնության պատգամավորը հայտնեց, որ Կառավարությունում քննարկվում է նաև զինծառայողների սոցիալական պաշտպանության համակարգին առնչվող փոփոխություններ` նոր երաշխիքների ավելացում:

Տնտեսական հարցերի մշտական հանձնաժողովի նախագահ Բաբկեն Թունյանը տարընթերցումներից խուսափելու համար իր ելույթում մանրամասնեց. «Մարդիկ կան, որոնք գնում են զինկոմիսարիատ, գրանցվում ու մեկնում առաջնագիծ, կամ էլ զինկոմիսարիատն է նրանց զորակոչում, երկու դեպքում էլ, եթե այդ մարդիկ համարվում են պահեստազորի ռեզերվ, համարվում են զինծառայող ու վարձատրվում են: Այսինքն՝ և՛ ծանուցագիր ստացածները, և՛ չստացածները, որոնք գնում են զինկոմիսարիատների միջոցով և համարվում են պահեստազորի անդամ, վարձատրվելու են»:

Ստացվում է, որ ռազմական դրության ժամանակ զորակոչված անձինք հավասարեցվում են զինծառայողի կարգավիճակին և նրանց վրա տարածվում են զինծառայողների ապահովագրության երաշխիքները:

Նախագիծն առաջին ընթերցմամբ ընդունվեց միաձայն։