Home / Կանանց իրավունքներ / Ոստիկանական բռնություն` ի պատասխան կանանց երթի․ Մարտի 8 Բաքվում

Ոստիկանական բռնություն` ի պատասխան կանանց երթի․ Մարտի 8 Բաքվում

«Մենք, երթի մասնակիցներս, վրդովված ենք կանանց բազմաթիվ սպանություններից, ինքնասպանություններից, գենդերային հիմքով խտրականությունից, ամբողջ տարվա ընթացքում Ադրբեջանում տեղի ունեցած բռնությունից, խոցելի խմբերին համավարակի ընթացքում պաշտպանելու մեխանիզմների բացակայությունից», – հայտարարել են ադրբեջանցի ֆեմինիստները՝ Բաքվում տեղի ունեցած երթի ժամանակ։

Ավելի վաղ՝ մինչև նույնիսկ երթի սկիզբը, առնվազն 20 հոգի բերման է ենթարկվել։ Ոստիկանությունը, շատերի պնդմամբ, այս երթի ընթացքում կիրառել է աննախադեպ բռնություն։

Երթի մասնակիցներից մեկը՝ Ռաբիյա Մամմադովան, տեղափոխվել է հիվանդանոց։ Ֆեյսբուքյան իր էջում նա պատմել է, որ ոստիկանները վնասել են թևը, քաշել մազերը։

Բաքվի ոստիկանները ներխուժել են նաև քաղաքի սրճարաններից մեկը, որտեղ ակտիվիստները հաճախ են հավաքվում, և բերման ենթարկել երթի կազմակերպիչներից Վաֆա Նաղիին և մասնակից Սեվգի Իսմայիլովային։

Ակտիվիստներն օրեր առաջ էին դիմել Բաքվի քաղաքապետարանին՝ երթի թույլտվության համար․․․և մերժվել։

Ակտիվիստներն օրեր առաջ էին դիմել Բաքվի քաղաքապետարանին՝ երթի թույլտվության համար․․․և մերժվել։

Ոստիկանությունը զգուշացրել էր, որ թույլ չի տալու հավաքի անցկացումը։ Իրենց խոսքով՝ պատճառը համավարակային սահմանափակումներն են։ Երթի մասնակիցներն ի պատասխան հիշեցնում էին Բաքվում պատերազմից հետո տեղի ունեցած ռազմական շքերթի մասին․․․

Ադրբեջանի իրավապահներ ֆեմինիստների, ինչպես նաև շատ այլ ցուցարարների նկատմամբ բռնություն էին գործադրում նաև անցյալ տարիներին՝ կորոնավիրուսի համավարակից շատ առաջ:

Ավելի ուշ բերման ենթարկված որոշ անձանց ազատ են արձակել։ Վերջիններս վերադարձել են հրապարակ՝ երթը շարունակելու։ Կանայք բարձրաձայն կարդացել են հայտարարությունը, որում, ի թիվս այլի, ասված է․

«Մենք, երթի մասնակիցներս, պահանջում ենք պետությունից․ վավերացրեք Ստամբուլյան կոնվենցիան․․․․ Անվտանգություն ապահովել բոլոր մարդկանց համար՝ անկախ գենդերից և կողմնորոշումից», «Կանանց նկատմամբ հանցագործությունները պետք է հետաքննվեն օրինական ձևով և արդարացիորեն, իսկ հանցագործները՝ ենթարկվեն պատասխանատվության»։