Epress.am Լուրեր Հայաստանից
Հայաստանյան դատարանը տղամարդուն 7 տարի 6 ամիս ազատազրկման է դատապարտել` նրան մեղավոր ճանաչելով նույնասեռական երիտասարդի նկատմամբ (այդ թվում՝ սեռական) բռնության մեջ, հայտնում է «Փինք» ՀԿ-ն։ Epress.am-ի տվյալներով՝ մեղավոր ճանաչված տղամարդը ոստիկան էր։
2019-ին տղամարդը՝ տուժողը, համացանցով ծանոթացել է մեկ այլ տղամարդու հետ, նրանք պայմանավորվել են հանդիպել։ Երբ հանդիպել են, տուժողը տեսել է, որ իրեն մոտեցած մեքենայի վարորդը բոլորովին այլ մարդ է։ Վերջինս հրազենն ուղղել է երիտասարդի վրա և պահանջել նստել մեքենան։
Վարորդը մեքենայի մեջ մի քանի անգամ ձեռքով հարվածել է տուժողի դեմքին, պահանջել դատարկել գրպանները, վերցրել նրա մոտ եղած գումարը և ավալի շատ գումար պահանջել՝ սպառնալով, որ հակառակ դեպքում տուժողին աութինգ կանի (կպատմի հարազատներին)։ Ընթացքում բռնարարը նորից մի քանի անգամ հարվածել և սեռական բնույթի հայհոյանքներ ու վիրավորանքներ է հնչեցրել երիտասարդի հասցեին։
Ոստիկանը նաև ասել է, թե ուզում է «դաստիարակել» տուժողին, սպառնացել է նույնասեռ վարքի համար նրան ոստիկանական բաժանմունք տանել, որտեղ բոլոր ոստիկանները նրան սեռական և ֆիզիկական բռնության կենթարկեին։ Այնուհետև նա տղային ստիպել է իր հետ սեռական հարաբերություն է ունենալ, ինչից հետո միայն թույլ է տվել, որ նա հեռանա։
Դեպքի առթիվ քրեական գործ է հարուցվել, որի քննությունը տևել է շուրջ երեք տարի։
Տուժողի ներկայացուցիչ Լուիզա Վարդանյանը դատաքննության ընթացքում որպես միջնորդություն է ներկայացրել Քրեական օրենսգրքի 63-րդ հոդվածը, որը սահմանում է պատիժն ու պատասխանատվությունը ծանրացնող հանգամանքները, հակասահմանադրական ճանաչելու պահանջով դիմել է Սահմանադրական դատարանին։
Հոդվածով ատելության հիմքով հանցագործություններ են համարվում միայն ազգային, ռասայական և կրոնական ատելության շարժառիթով կատարված հանցանքները․ սեռական կողմնորոշումը կամ գենդերային ինքնությունը չեն դիտվում որպես ատելության հիմքեր։ Այս միջնորդությունը դատարանի կողմից մերժվել է։
2022 թվականին հրապարակվել է գործով դատավճիռը։ Հանցագործը մեղավոր է ճանաչվել իր կատարած բոլոր հանցանքների համար և դատապարտվել ազատազրկման՝ 7 տարի 6 ամիս ժամկետով։ Դատավճռով հաստատվել է, որ տղամարդը նախապես տեղյակ է եղել տուժողի սեռական կողմնորոշման մասին՝ նույնասեռականությունը բնութագրելով որպես «ոչ ավանդական սեռական կողմնորոշում»։
«Նշենք, որ վերջին տարիների ընթացքում սա Փինքի կողմից վարվող գործերից առաջինն է, երբ հանցավորի նկատմամբ մեղադրական դատավճիռ է կայացվում, և նա մեղավոր է ճանաչվում նույնասեռական անձի հանդեպ հանցագործություն կատարելու մեջ։ Ճիշտ է, դատարանը չի արձանագրել, որ հանցագործությունները կատարվել են սեռական կողմնորոշման նկատմամբ ատելության շարժառիթով, ավելին, դատարանի կողմից գործածվել են խտրական արտահայտություններ, սակայն, այնուամենայնիվ, իրավակիրառ պրակտիկայում նման որոշում կայացնելը առաջընթաց է և կազմակերպության ձեռքբերումներից է», – ասված է Փինքի հաղորդագրության մեջ։