Ոստիկանությունը կլոր սեղան է հրավիրում Մաշտոցի պուրակի խնդրի շուրջ

ՀՀ ոստիկանությունը պատրաստակամություն է հայտնել մարտի 17-ին, ժամը 16:30-ին կլոր սեղան հրավիրել և բացատրել իր դիրքորոշումը` կապված մարտի 14-ին Մաշտոցի պուրակում իրականացրած իր գործողությունների հետ: Հիշեցնենք, որ այդ օրը բողոքի ակցիա անցկացնող բնապահպան ակտիվիստների վրանը քանդվել և առգրավվել էր ոստիկանների կողմից:

Ոստիկանությունը կլոր սեղանի մասնակցելու համար հրավիրում է ՀՀ Մարդու իրավունքների պաշտպանի գրասենյակի, «Մենք ենք այս քաղաքի տերը», «Մարդու իրավունքների և ժողովրդավարության ինստիտուտի», «Թռչկան», «Մեր քաղաքը» քաղաքացիական նախաձեռնություններին, ՀՅԴ և «Ժառանգություն» կուսակցությունների ներկայացուցիչներին: Կլոր սեղանը նախատեսվում է անցկացնել ՀՀ ոստիկանության շենքում (հասցեն՝ Նալբանդյան 130):

Հրավիրող կողմը պատրաստ է քննարկել հետևյալ հարցերը.

–       Ընդհանուր ազատությունը («թույլատրելի է այն ամենը, ինչն արգելված չէ օրենքով») որպես սկզբունք և իրավունք,

–       «Հասարակական կարգ» և «հասարակական անվտանգություն» եզրույթների հասկացությունն ու բովանդակությունը,

–       Հասարակական վայրերում վրանի/վրանների տեղադրման իրավաչափությունը,

–       Ոստիկանության հայեցողության սահմանները, հարկադրանքի կիրառման նախապայմանները,

–       Լարվածությունը թուլացնելու սկզբունքը ոստիկանության գործելակերպում,

–        Եվրոպական դատարանի նախադեպային իրավունքը և ԵԱՀԿ չափորոշիչները վերը նշված հարցերի համատեքստում: