ԱԱԾ-ի նոր ղեկավարն է Սերժ Սարգսյանի փեսայի ընկերը

Հայաստանի նախագահ Սերժ Սարգսյանը փետրվարի 12-ին հրամանագիր է ստորագրել, որով Կառավարությանն առընթեր ազգային անվտանգության ծառայության տնօրեն է նշանակվել Գեորգի Կուտոյանը։ ԱԱԾ նախկին պետ Գորիկ Հակոբյանին երկրի ղեկավարը ևս անգործ չթողեց՝ տեղավորելով իր իսկ խորհրդականի պաշտոնում։

Մինչ ԱԱԾ-ի նոր պետի պաշտոնական կենսագրությանն անցնելը, նշենք, որ 35-ամյա Կուտոյանը Սերժ Սարգսյանի դստեր ամուսնու՝ Միքայել Մինասյանի ընկերներից է։ Այս փաստը Epress.am-ի հետ զրույցում հաստատեցին Կուտոյանի նախկին գործընկերները։

Այսպիսով՝ սա առաջին դեպքն է, երբ Մինասյանի թիմակիցը զբաղեցնում է ուժային կառույցի ղեկավարի պաշտոնը։ Մինչ այդ նախագահի փեսան ամրապնդում էր դիրքերը հայաստանյան մեդիա և դիվանագիտական դաշտերում։

Գեորգի Կարենի Կուտոյանի պաշտոնական կենսագրությունը

Ծնվել է 1981թ. սեպտեմբերի 30-ին Երևանում:

2002թ. գերազանցությամբ ավարտել է Ռուսաստանի Դաշնության Ռոստովի պետական համալսարանի իրավագիտության ֆակուլտետը:

2005թ. ավարտել է Հայաստանի Հանրապետության գիտությունների ազգային ակադեմիայի փիլիսոփայության և իրավունքի ինստիտուտի ասպիրանտուրան, պաշտպանել է թեկնածուական ատենախոսություն «1950թ. Մարդու իրավունքների և հիմնարար ազատությունների մասին կոնվենցիան Հայաստանի Հանրապետության ազգային իրավական համակարգում (սահմանադրաիրավական հետազոտություն)» թեմայով և ստացել իրավաբանական գիտությունների թեկնածուի գիտական աստիճան:

2007թ. ավարտել է Ամերիկայի Միացյալ Նահանգների Ֆլետչերի իրավունքի և դիվանագիտության դպրոցը (Թաֆթս համալսարան):

2002-2010թթ. դասավանդել է Հայ-Ռուսական (Սլավոնական) համալսարանում, Հայաստանի Հանրապետության պետական կառավարման ակադեմիայում և Հայաստանի Հանրապետության գիտությունների ազգային ակադեմիայում:

2005-2006թթ. աշխատել է Հայաստանի Հանրապետության գլխավոր դատախազությունում, նախ՝ որպես գիտաուսումնական կենտրոնի գիտական աշխատող, ապա՝ իրավական և կառուցվածքային բարեփոխումների բաժնի դատախազ:

2006-2007թթ. աշխատել է Հայաստանի Հանրապետության մարդու իրավունքների պաշտպանի աշխատակազմում՝ որպես Հայաստանի Հանրապետության մարդու իրավունքների պաշտպանի ավագ խորհրդական, իսկ 2008-2010թթ.՝ որպես Հայաստանի Հանրապետության մարդու իրավունքների պաշտպանի աշխատակազմի գլխավոր իրավախորհրդատու:

2008թ. ստացել է փաստաբանական գործունեության արտոնագիր, 2010-2011թթ. զբաղվել է մասնավոր փաստաբանական գործունեությամբ:

2011-2016թթ. զբաղեցրել է Հայաստանի Հանրապետության Նախագահի օգնականի պաշտոնը:

2011-2014թթ. եղել է ՀՀ Նախագահի հրամանագրով ստեղծված Կոռուպցիայի դեմ պայքարի խորհրդին առընթեր հակակոռուպցիոն ռազմավարության իրականացման մոնիտորինգի հանձնաժողովի նախագահը:

Հայաստանի Հանրապետության Նախագահի 2013թ. ապրիլի 17-ի հրամանագրով պարգևատրվել է Մխիթար Գոշի մեդալով:

1998-2000թթ. զինվորական ուսուցում է անցել Ռուսաստանի Դաշնության Ռոստովի պետական համալսարանի ռազմական պատրաստության ֆակուլտետում՝ պահեստի սպաների պատրաստման ծրագրով:

Արդարադատության առաջին դասի խորհրդական է:

Օտար լեզուների իմացություն՝ ռուսերեն, անգլերեն, ֆրանսերեն:

Ամուսնացած է, ունի մեկ որդի: