Epress.am Լուրեր Հայաստանից
Իրանի դատական համակարգի ղեկավար Ղոլամհոսեյն Մոհսենի Էջեի առաջարկով գերագույն հոգևոր առաջնորդ այաթոլա Ալի Խամենեին ներում է շնորհել շուրջ երեք հազար բանտարկյալների։ Ներում ստացածների թվում են տարբեր հոդվածներով դատապարտված օտարերկրացիներ և հակապետական հանցագործությունների մեջ մեղադրվողներ։
Պետական IRNA լրատվական գործակալությունը հաղորդում է, որ համաներման հրամանը վերաբերելու է 2 հազար 887 բանտարկյալների, որոնցից ոմանք ազատ են արձակվելու, ոմանց պատիժը մեղմանալու է։ 59 մարդու մահապատիժը փոխարինվել է ազատազրկմամբ։ Խամենեիի այս որոշումը նվիրված էր Մուհամեդ մարգարեի ծննդյան օրվա նախաշեմին:
2024 թվականի առաջին 8 ամիսների ընթացքում Իրանում առնվազն 376 դատապարտյալի կախաղան են բարձրացրել։ Միայն այս ամսվա առաջին 15 օրերի ընթացքում մահապատժի է ենթարկվել 70 մարդ։ Նախագահական ընտրությունների ընթացքում «օրինական սպանություններ» ժամանակովորապես չէին իրականացնում։ Ընտրական պրոցեսների ավարտից հետո դրանց թիվը կտրուկ մեծացել է։
Amnesty International-ի տվյալներով, 2023 թվականին Իրանում առնվազն 853 մահապատիժ է իրականացվել, ինչը աշխարհում բոլոր մահապատիժների մոտ 73 տոկոսն է կազմում։ Դեպքերից 481-ը՝ կեսից ավելին, վերաբերում են թմրանյութերի օգտագործմանը։ 2022-ին թմրանյութ օգտագործելու կամ իրացնելու համար կախաղան էին բարձրացրել 255 դատապարտյալի, այսինքն մեկ տարում այս ցուցանիշն աճել է 89 տոկոսով։ 2021-ին նմանատիպ մեղադրանքներով մահապատժի ենթարկվածների թիվը 132 էր։