Home / Բանտ / «Սասնա ծռերի» կալանավորված աջակցի կյանքը վտանգի տակ է․ փաստաբան

«Սասնա ծռերի» կալանավորված աջակցի կյանքը վտանգի տակ է․ փաստաբան

«Սասնա ծռեր» խմբին օժանդակելու մեջ մեղադրվող, որպես «հաց բերող» հայտնի Արթուր Սարգսյանի առողջական վիճակը ծանր է։

Epress.am-ի հետ զրույցում Սարգսյանի պաշտպան Դավիթ Գյուրջյանը նշել է, որ նա շատ թույլ է ու բնական կարիքները հոգալու համար միայն ուղեկցողների օգնությամբ է անկողնուց բարձրանում։

Պաշտպանի խոսքով՝ Սարգսյանը երեք օր արյան փսխումներ է ունեցել ՝ փետրվարի 15-ին, 18-ին և 19-ին։

«Արյան փսխումները կապված են կերակրափողի ճաքի և էրոզիայի հետ, որը նա ուներ դեռ դեկտեմբերին, բայց արդեն ապաքինվել էր վերքը։ Իսկ հիմա, փաստորեն, կրկին բացվել է վերքը, ինչի հետևանքով էլ արյան փսխումներ է ունենում»,- նշել է փաստաբանը։

Գյուրջյանը տեղեկացրել է, որ Սարգսյանը դեռ շարունակում է փետրվարի 9-ից սկսած հացադուլը ու չի պատրաստվում այն դադարեցնել։ Նա հրաժարվել է նաև բուժօգնությունից։

Փաստաբանի խոսքով՝ արդեն այն վիճակն է, որ ոչ թե Սարգսյանի առողջությանն է վտանգ սպառնում, այլ կյանքին։ Գյուրջյանն ասել է, որ երեկ իրենք նաև ստացել են Սարգսյանին ազատ արձակելու մասին Վերաքննիչ դատարանի բացասական պատասխանը։

Նշենք, որ ի զորակցություն Արթուր Սարգսյանի հացադուլ են հայտարարել նաև «Սասնա ծռեր» խմբի անդամներ Արայիկ Խանդոյանը և Արեգ Կյուրեղյանը։

Սարգսյանը հացադուլով է արձագանքել իրեն երկրորդ անգամ կալանավորելու Հատուկ քննչական ծառայության որոշմանը։ Նա հացադուլի մեջ է կալանավորման օրվանից՝ փետրվարի 9-ից։ Ի համերաշխություն Սարգսյանի բողոքի ակցիա է անցկացվել նաև բանտից դուրս։ Երևանում փետրվարի 14֊ին բողոքի երթ է կազմակերպվել։ Դրա մասնակիցները մտահոգված են, որ հացադուլը շատ վտանգավոր կարող է լինել Արթուր Սարգսյանի առողջության համար, քանի որ վերջինս արդեն տառապում է ծանր հիվանդություններով, և դրանց հիմքով էլ ստորագրությամբ ազատ էր արձակվել դեկտեմբերի 31-ին շուրջ 5 ամիս կալանավայրում լինելուց հետո։ Սարգսյանը 2016-ի հուլիսի 26-ին ճեղքել է ոստիկանական պատնեշը և սննունդ հասցրել Էրեբունի համայնքի ՊՊԾ գնդում գտնվող «Սասնա ծռեր» խմբի անդամներին և բժիշկների. ըստ մեղադրանքի, նա «օժանդակել է բժիշկներին պատանդ պահելուն, ապօրինի զենք-զինամթերք է փոխադրել և կրել»։