Epress.am Լուրեր Հայաստանից
Համայնքային ջրամատակարարման շնորհիվ Նոր Հաճնում խմելու ջուրը շուրջօրյա է, վթարների սպասարկումը՝ արագ, սակագինը՝ ցածր։ Սա միակ համայնքն է, որտեղ Վեոլիա ջուրը դեռ չկա, սպասարկումն իրականացնում է լուծարման եզրին կանգնած Հաճն ջուր ՀՈԱԿ-ը։
Նոր Հաճնի համայնքային կառույցները 2017-ին հրաժարվել են Վեոլիա ջուր մոնոպոլիստ ընկերության հետ պայմանագիր կնքելուց։ Ըստ տեղական ՀՈԱԿ-ի տնօրենի՝ Վեոալիան հաշվի չէր առնում ո՛չ ենթակառուցվածքների մաշվածությունը, ո՛չ էլ դրանով պայմանավորված ջրի բնական կորուստը, համայնքին վերաբերվում էին որպես մասնավոր ընկերության կամ անհատ սպառողի՝ պարտադրելով վճարել նաև փաստացի չօգտագործված ջրի համար։ Պայմանագրից հրաժարվելուց հետո Նոր Հաճնը հայտնվել է սանկցիաների տակ․ ֆրանսիական կորպորացիան մի քանի անգամ դատի է տվել ջրամատակարարման զբաղվող տեղական ՀՈԱԿ-ին, դատարանն ամեն անգամ վճռել է կալանք դնել համայնքային ընկերության հաշիվների վրա և բռնագանձել սպառողներից ստացած գումարները հարկադրաբար։ Տրամաբանությունը հետևյալն էր՝ (թեև պայմանագիր չկա) Վեոլիան այնուամենայնիվ ջուր է մատակարարում ու (թեև պայմանագիր չկա) պետք է վարձատրվի մատակարարած ջրի դիմաց։ Համայնքային կառույցների բարձրաձայնած հարցերն այս տրամաբանությունից դուրս էին մնացել։ Հաճն ջուր ՀՈԱԿ-ը արդեն իսկ սնանկ է ճանաչվել և կանգնած է լուծարման եզրին։
Տեղացիները հերքում են Երևանի քաղաքապետի մեղադրանքները, իբր թե իրենք ջրագող են։ «Վեոլիա ջուրը փորձում է ստեղ մտնել՝ չենք թողել։ Մի անգամ փակել ենք մոստը։ Եթե էլի մտնեն, էլի չենք թողնի», – ասում էին քաղաքի կենտրոնում հավաքված տղամարդիկ։