Բաքվում էկոմիջոցառման ժամանակ էկոակտիվիստ են ձերբակալել

Բաքվում ընթացող ՄԱԿ-ի Կլիմիայի փոփոխության СОР29 գագաթնաժողովի ժամանակ ձերբակալվել է տեղական էկոակտիվիստ Քյամրան Մամեդլին։ Նա բողոքի ակցիա էր իրականացնում ընդդեմ Ադրբեջանում սովորական համարվող փողոցային շների սպանությունների։

Ընդդիմադիր MeydanTV հրատարակչության լրագրողներ Հայալա Ագաևան և Այթաջ Թափտիգը, որոնք նկարահանում էին ակտիվիստի ձերբակալությունը, կոնֆերանսի դահլիճից բռնի հեռացվել են ոստիկանության աշխատակիցների կողմից։ Այս մասին ԲիԲիՍիին հայտնել է մեդիա հարթակի գլխավոր խմբագիր Սևդա Սամեդովան։

Օտարերկրացի էկոլոգիական ակտիվիստներին այս օրերին Բաքվում ցույցեր անել թույլատրվում է։ Ադրբեջանական Report հրատարակչությունն այսօր գրել է, որ ասիական երկրների մի խումբ ակտիվիստներ գագաթնաժողովի ընթացքում բողոքի ակցիա են իրականացրել՝ պահանջելով քչացնել հանածո վառելիքի օգտագործում է ասիական տարածաշրջանում։

Կլիմայական փոփոխությունների գլխավոր միջազգային կոնֆերանսն ամեն տարի անց է կացվում նոր երկրում։ Ադրբեջանն COP գագաթնաժողովի արդեն երրորդ երկիր-կազմակերպիչն է, որը մեղադրվում է ակտիվիստների նկատմամբ հետապնդումների մեջ։

Իրավապաշտպաններն Ադրբեջանին մեղադրում են COP29-ը շահարկելու և էկոակտիվիստների ու այլ քաղաքականապես ակտիվ մարդկանց նկատմամբ ճնշումները մեծացնելու մեջ։ Իշխանությունները մեղադրանքները հերքում են, պնդելով, որ երկրում քաղբանտարկյալներ առհասարակ չկան։

Իրավապաշտպան կազմակերպությունները ՄԱԿ-ին կոչ են անում վերանայել գագաթնաժողովի իրականացման համար երկրների ընտրության չափորոշիչները։ Նրանց խոսքով, միջոցառմանն ընդառաջ Ադրբեջանում քաղբանտարկյալների կտրուկ աճ է նկատվել։

Նոյեմբերի 11-ին, երբ Բաքուն հյուրընկալել էր ՄԱԿ-ի Կլիմիայի փոփոխության գագաթնաժողովը, Հարավային Կովկասի որոշ ակտիվստներ հավաքվել էին Թբիլիսիում՝ բողոքելու ադրբեջանական ռեժիմի կեղծավորության, քաղաքական ճնշումների, էթնիկ զտումների, գրինվոշինգի (նավթային երկիր լինելով՝ կանաչ տնտեսություն խրախուսումը ձևացնելը) դեմ։ Ակցիային միացել էր նաև շվեդ հայտնի ակտիվիստ Գրետա Տունբերգը, որը 15 տարեկանից պիկետներ է անում՝ պահանջելով կառավարություններից որդեգրել կլիմիայական փոփոխությունները զսպող քաղաքականություն։

Ակցիայի տեսանյութը՝ այստեղ

Amnesty International-ի ներկայացուցիչ Նատալյա Նոզաձեն ԲիԲիՍիին պատմել է, որ COP29-ի անցկացման մասին հայտարարությունից հետո Ադրբեջանում անհամեմատ բարդացել է իշխանությունների քաղաքականության դեմ բողոքի ակցիաներ իրականացնելը կամ պարզապես քննադատելը։

«Հանուն Ադրբեջանի քաղբանտարկյալների» կազմակերպության տվյալներով, այս տարի 2000-ականների սկզբից ի վեր առաջին անգամ երկրում քաղբանտարկյալների թիվը գերազանցել է 300-ը։ Քաղաքական դրդապատճառներով ազատազրկվածների շարքում կան լրագրողներ, գիտնականներ, բնապահպանական ակտիվիստներ, ընդդիմության ներկայացուցիչներ։