Քաջարանում գործադուլի մասնակիցներին սպառնում է նույնիսկ արհմիությունը

Զանգեզուրի պղնձամոլիբդենային կոմբինատի աշխատողները երեկվանից գործադուլ են անում՝ աշխատավարձի բարձրացման պահանջով: Գործարանը, ըստ նրանց, չի ապահովում աշխատակիցների տարրական իրավունքները և հրաժարվում է ընդառաջել նրանց պահանջներին։

ԶՊՄԿ-ն Հայաստանի համար մեկ հարկատուն է՝ ամենախոշոր ձեռնարկությունը, որը 2018-ի հեղափոխությունից հետո նաև պետական մասնակցություն ունի։

Հունվարի 31-ին հարյուրավոր աշխատակիցներ գործադուլ են հայտարարել։ Աշխատողները բողոքում են՝ գործարանը չի ապահովում իրենց տարրական իրավունքները և հրաժարվում է ընդառաջել պահանջներին։ Նրանք պայմանների բարելավում և աշխատավարձի բարձրացում են պահանջում։

[թարմացում – Epress.am-ի հետ զրուցում գործադուլավորները հերքել են ԶԼՄ-ներում տարածվող տեղեկությունը, թե իրենք աշխատավարձի համահարթ՝ 50 տոկոսանոց բարձրացում են պահանջում։ Մեր զրուցակիցների խոսքով, տնօրինությանը ներկայացվել է պահանջ՝ բարձրացնել աշխատավարձը պրոգրեսիվ սանդղակով․ մինչև 300 հազար դրամ ստացողներինը՝ 40 տոկոսով, 300-ից 500 հազար ստացողներինը՝ 30 տոկոսով, 500-ից 1 միլիոն ստացողներինը՝ 20 տոկոսով։ «Իսկ միլիոնից ավել ստացող երևանցիներինը ուզում են՝ թող բարձրացնեն, չեն ուզում` թող չբարձրացնեն»]

«Ես աշխատում եմ հարստացուցիչ ֆաբրիկայում, սելեկցիայի բաժնում: Ամենակարևորը՝ օդափոխության համակարգ, նորմալ զուգարանային պայմաններ, տաք ջուր զուգարանում, ճաշասենյակներում լվացարաններ չկան: Ձմռանը ցուրտ է, ամռանը՝ շոգ, ներսում թունավոր օդ է: Մեր առաջնային պահանջն է՝ բաց երկխոսություն կազմակերպեն աշխատակիցների ու տնօրինության միջև», – «Ազատությանը» պատմել է գործադուլավորներից Վահե Մխիթարյանը:

Երեկ առավոտյան աշխատողները հանդիպել են տնօրենին ու փոխտնօրեններին: Ըստ Մխիթարյանի, նրանք հրաժարվել են քննարկել աշխատավարձի հարցը: Քաջարանի համայնքապետը միջնորդել է, որ բանակցությունները շարունակվեն, բայց կոմպրոմիսի հասնել չի հաջողվել։

ԶՊՄԿ-ի արհմիությունն էլ՝ աշխատավորներին պաշտպանելու փոխարեն, համատեղ հայտարարություն է տարածել գործարանի տնօրենության հետ, ասել է թե՝ աշխատողների պահանջը «անիրատեսական է», գործադուլն էլ՝ «անօրինական»։ Արհմիությունը և տնօրինությունը սպառնացել են գործադուլին միացած աշխատակիցներին ուղարկել հարկադիր պարապուրդի։

Տնօրինության սպառնալիքները հակառակ ազդեցություն են ունեցել։

«Մեր պահանջը արդար է: Մենք պայքարելու ենք, եթե նույնիսկ ցուցակ են կազմել 50 հոգու, ում պատրաստվում են հեռացնել ու սպառնում են դրանով: Ես էլ եմ այդ ցուցակի մեջ և կաշկանդվածություն չունեմ ընդհանրապես: Ակնհայտ սպառնալիք է այդ հայտարարությունը ու մեզ չի վախեցրել, երեկոյան հավաքվելու ենք Քաջարան քաղաքում ու շարունակելու ենք ակցիաները: Սա արժանապատվության հարց է: Ֆաշիստներն էին այսպես անում, մարդկանց փակում էին մի տարածքում ու ներարկում թունավոր նյութեր: Գուցե էմոցիոնալ է, բայց այս պայմաններում հնարավոր չէ աշխատել», – «Ազատությանն» ասել է Վահե Մխիթարյանը:

Ըստ նրա՝ գործադուլի մասնակիցներից մոտ երկու հարյուր հոգի այսօր գիշերել է գործարանի տարածքում: Նրանք մտադիր են շարունակել իրենց պայքարը։

2022-ին էլ Կապանի հանքարդյունբերական կոմբինատի աշխատողներն էին գործադուլ անում։ Արհմիությունը այն ժամանակ էլ էր մոտավորապես նույն գիծը տանում՝ նախատել բանվորներին, սատարել գործատուներին։

տե՛ս Գործադուլը Կապանում շարունակվում է․ տնտեսում են հանքափորների առողջության հաշվին