Home / Դատարան / Հույս կա, որ Մատենադարանում կատարված չարաշահումները կստանան իրավական գնահատական

Հույս կա, որ Մատենադարանում կատարված չարաշահումները կստանան իրավական գնահատական

Երևան քաղաքի առաջին ատյանի ընդհանուր իրավասության դատարանը այսօր բավարարեց Մատենադարանի արհեստակցական կազմակերպության դիմումը՝

– ամբողջությամբ բեկանել Երևան քաղաքի առաջին ատյանի ընդհանուր իրավասության դատարանի ԵԴ/0379/11/2020 գործով 04․02․2021 թվականին կայացված որոշումը,
– հարուցել քրեական գործ և հանձնարարել վարույթն իրականացնող մարմնին իրականացնել համապատասխան քննություն։

Արհմիության անդամ Գայանե Այվազյանը այս կապակցությամբ ֆեյբուքի իր էջում մասնավորապես գորել է․ «Ավելի քան մեկուկես տարի տևած դատական քաշքշուկներից հետո արհմիության դիմումը բավարարվեց: Հուսով եմ, որ արդարադատությունը կգործի, և ինստիտուտում կատարված չարաշահումները կստանան իրավական գնահատական»:

Հիշեցնենք՝ Մատենադարանի աշխատողների արհեստակցական կազմակերպության նախագահությունը բացահայտել է «Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտ» հիմնադրամի կառավարման մարմինների ձևավորման որոշ հանգամանքներ, որոնց մասին ձեռք բերված տեղեկատվության վրա հիմնվելով՝ պարզել է, որ գործ ունենք թույլ տրված չարաշահումների և չի բացառվում՝ առերևույթ հանցագործության հետ:

2018 թ. հունվար (19) և մարտ (6) ամիսներին տեղի ունեցած կառավարման մարմինների ընտրությունների արդյունքում Մատենադարանի Հոգաբարձուների խորհրդի նախագահ է ընտրվել Լևոն Ազատի Սարգսյանը, տնօրեն՝ Վահան Տեր-Ղևոնդյանը: Ընտրություններն ուղեկցվել են օրենքի և կանոնադրության պահանջների խախտմամբ:

2018 թվականի Թավշյա հեղափոխությունից հետո՝ հուլիսի 27-ին, տեղի է ունեցել Հոգաբարձուների խորհրդի արտահերթ նիստ. «նկատի ունենալով երկրում տեղի ունեցող քաղաքական փոփոխությունները և հայտնի իրադարձություններով պայմանավորված»՝ խորհուրդը որոշել է իրականացնել կանոնադրության փոփոխություն: Հիշյալ նիստին, ըստ արձանագրության, մասնակցել են Խորհրդի թվով 13 անդամներ:

Կանոնադրության փոփոխություն հնարավոր է իրականացնել Խորհրդի անդամների ընդհանուր թվի ձայների որակյալ մեծամասնությամբ՝ 2/3-ով: Նկատի ունենալով, որ հիշյալ նիստին, ըստ արձանագրության, մասնակցել են 19-ից միայն 13 անդամ, Կանոնադրությունում հնարավոր կլիներ փոփոխություն մտցնել, եթե մասնակից բոլոր 13 անդամները քվեարկեին դրա օգտին: Նիստի արձանագրության պատճենից ակնհայտ է, որ 13-ի փոխարեն արձանագրությունը ստորագրել են միայն 10-ը: Սակայն այսքանով հանդերձ՝ Կանոնադրությունում կատարվել է փոփոխություն:
Կանոնադրության վերոնշյալ փոփոխությունը գրանցվել է ՀՀ ԱՆ իրավաբանական անձնաց պետական ռեգիստրում, որի համար Մատենադարանի տնօրենության կողմից ներկայացվել են «համապատասխան» փաստաթղթեր: Նշված փաստաթղթերի ուսումնասիրությամբ պարզվել է, որ Կանոնադրությունում փոփոխություն կատարելու հիմք հանդիսացել է ոչ թե Հոգաբարձուների խորհրդի 2018 թվականի հուլիսի 27-ի արտահերթ նիստի արձանագրությունը, այլ դրանից կատարված քաղվածքը, որը ստորագրվել է Մատենադարանի տնօրենի կողմից: Հիշյալ քաղվածքի համաձայն՝ Հոգաբարձուների խորհրդի վերոնշյալ արտահերթ նիստի արձանագրությունը ստորագրել են նիստին մասնակցած բոլոր 13 անդամները: Այսպիսով, Մատենադարանի տնօրենության կողմից ՀՀ ԱՆ իրավաբանական անձնաց պետական ռեգիստր է ներկայացվել ակնհայտ կեղծ տեղեկություն:

Մատենադարանի աշխատողների արհեստակցական կազմակերպությունը շնորհակալություն է հայտնում Հելսինկյան քաղաքացիական ասամբլեայի Վանաձորի գրասենյակին և արհմիության բոլոր ընկերներին ավելի քան մեկուկես տարի տևած դատավարական գործընթացի ժամանակ ցուցաբերած աջակցության և սատարումի համար: