«Ապտակ Մակրոնին»․ խորհրդարանական ընտրություններ Ֆրանսիայում

Նախագահի պաշտոնում վերընտրվելուց երկու ամիս չանցած՝ Էմանուել Մակրոնը կորցրեց վերահսկողությունը Ֆրանսիայի խորհրդարանական ընտրություններում․ ցենտրիստի «Միասի՛ն» կոալիցիան չհավաքեց ձայների մեծամասնությունը։ 

Ընդհանուր 577 մանդատից Մակրոնի կոալիցիան ստացավ 245 մանդատ (մոտ 100-ով ավելի քիչ, քան նախորդ ընտրություններում)։ Ձախական «NUPES» կոալիցիան՝ Ժան-Լյուկ Մելանշոնի գլխավորությամբ, ստացավ 131 մանդատ՝ դառնալով ամենամեծ ընդդիմադիր ուժը։ Ծայրահեղ աջական «Ազգային միավորում»-ը՝ Մարին Լը Պենի գլխավորությամբ, ստացավ ռեկորդային՝ 89 մանդատ: Աջ-կենտրոնամետ Հանրապետական կուսակցությունը ստացավ 61 մանդատ։ 

Խորհրդարանական ընտրությունները հանգեցրել են աննախադեպ քաղաքական իրավիճակի Ֆրանսիայում։ Այժմ, խորհրդարանում օրենքներ ընդունելու համար Մակրոնի կողմնակիցները կա՛մ պետք է համաձայնության գան հանրապետականների հետ մշտական ​​կոալիցիայի շուրջ, կա՛մ ամեն անգամ իրավիճակային դաշինքներ կնքեն այլ քաղաքական ուժերի հետ։

«Ապտակ Մակրոնին», «Քաղաքական երկրաշարժ», «Անկառավարելի Ֆրանսիա»․ ֆրանսիական մամուլը ընտրությունների մասին

Վերջին 5 տարիներին Մակրոնի կուսակցությունը զբաղեցնում էր Ազգային ժողովի մանդատների մոտավորապես 60%-ը, ինչը թույլ էր տալիս հեշտությամբ օրենքներ ընդունել՝ անտեսելով ձախական և աջական ընդդիմադիրների առարկությունները։

Այժմ նախագահի դաշինքը կրճատվել է մինչև մանդատների 40%-ը, ինչը նշանակում է, որ այն չի կարողանա որևէ օրենք ընդունել առանց նոր գործընկերներ ձեռք բերելու: Իսկ աջական Հանրապետական կուսակցության (նախագահի հետ դաշնակցելու պատրաստ ամենահավանական կուսակցությունը) առաջնորդը խոստացել է մնալ ընդդիմադիր դաշտում: 

Չկա հստակ սցենար, թե ինչպես կզարգանան իրադարձությունները Ֆրանսիայում: Վերջին դեպքը, որ նորընտիր նախագահին չի հաջողվել ստանալ բացարձակ մեծամասնություն խորհրդարանական ընտրություններում 1988 թվականին էր։ Մակրոնը, ի վերջո, կարող է արտահերթ ընտրություններ նշանակել, եթե առաջանա օրենսդրական փակուղի։

Ցենտրիստ Էմանուել Մակրոնի հիմնական առաջարկներն են նպաստների բարեփոխումը, հարկերի կրճատումը և կենսաթոշակային տարիքի աստիճանական բարձրացումը 62-ից 65-ի: Մակրոնն առաջարկում է նաև շարժվել դեպի ածխածնային չեզոքություն և լիարժեք զբաղվածություն (տնտեսության վիճակ, որում ներգրավված են բոլոր աշխատանքային ռեսուրսները): Նախագահի նոր առաջարկներից է կառավարման «նոր մեթոդի» ստեղծումը՝ քաղաքացիական հասարակության ավելի մեծ ներգրավվածությամբ։ 

Ձախական Ժան-Լյուկ Մելանշոնի դաշինքն առաջարկում է սառեցնել առաջին անհրաժեշտության ապրանքների գները, իջեցնել կենսաթոշակային տարիքը, սահմանափակումներ դնել ժառանգության վրա և արգելել ընկերություններին դիվիդենտներ վճարել՝ աշխատողներին աշխատանքից հեռացնելով: Մելենշոնը նաև կոչ է արել անհնազանդություն ցուցաբերել ԵՄ-ին։

Աջական Մարին Լը Պենը խոստացել է «վերականգնել Ֆրանսիայի ինքնիշխանությունը»՝ ստեղծելով հակամիգրացիոն, հակա-ԵՄ շարժում։ Նա առաջարկում է դադարեցնել ապաստանի իրավունքի չարաշահումը՝ սահմանափակելով ներգաղթը և արգելել հասարակական վայրերում հիջաբ կրելը։ 

Մակրոնի՝ եվրոգոտու երկրորդ խոշոր տնտեսությունը բարեփոխելու, կարողությունն այժմ կախված է ընդդիմադիր ուժերի՝ թե՛ ձախականների և թե՛ աջականների, աջակցությունից։