Բելառուսում ընկել են անկախ լրագրողների և իրավապաշտպանների ետևից

Այսօր առավոտյան Բելառուսում ոստիկանները խուզարկություններ են իրականացրել իրավապաշտպանների, լրագրողների, անկախ արհմիությունների ներկայացուցիչների բնակարաններում ու գրասենյակներում, հայտնում է Ազատություն ռադիոկայանի բելառուսական ծառայությունը։

Քննիչները, մասնավորապես, այցելել են Լրագրողների բելառուսական ասոցիացիա (ԼԲԱ), ռեգիստռացիայից զրկված «Վեսնա» կենտրոնի իրավապաշտպաններին, Ռադիոէլեկտրոնային արդյունաբերության անկախ արհմիության անդամներին, Մինսկում, Մոգիլյովում, Վիտեմբսկում, Գոմելում, Մոզիրում, Բրեստում և Ռեչիցայում բնակվող արհիութենական կամավորներին։ Ընդհանուր առմամվ նվազագույնը 25 խուզարկություն է իրականացվել։

Քննչական կոմիտեից հայտնում են, որ խուզարկությունների նպատակը «բողոքի ակցիաների ֆինանսավորման հանգամանքները պարզելն է»։

Մարդիկ, ում տներում խուզարկություններ են իրականացվել, պատմում են, որ իրենք քրեական որևէ կարգավիճակ չունեն։ Դեռևս հայտնի է մեկ ձերբակալվածի մասին․ Tut.by հարթակի փոխանցմամբ, բերման է ենթարկվել իրավապաշտպան Դմիտրի Սոլովյովը։ Լրագրողների ասոցացիայի նախագահ Անդրեյ Բաստունեցը պատմել է, որ ինքն անձամբ դեռևս ազատության մեջ կմնա, բայց քննիչներն արգելել են հանրայնացնել խուզարկության մանրամասները։ ԼԲԱ գրասենյակից առգրավել է ԷՀՄ համակարգային բլոկն ու կազմակերպության նոր անդամների հայտարարագրերի թղթապանակը։

https://twitter.com/baj_by/status/1361618057077141507

«Սա իսկական պետական ճգնաժամ է։ Հանուն իշխանության պահպանման, ռեժիմը ճնշում է այնգամ նրանց, ովքեր պաշտպանում են մարդկան իրավունքները։ Քանի դեռ երկրում նման բան է կատարվում, բոլորս վտանգի մեջ ենք», – խուզարկություններին անդրադառնալով հայտարարել  է Բելառուսի նախագահի նախկին թեկնածու Սվետլանա Տիխանովսկայան։ Նրա խոսքով, Ալեքսանդր Լուկաշենկոն այսպիսով ինքն իր ձեռքով իր և իր շրջապատի դեմ նյութեր է նախապատրաստում միջազգային դատարանի համար։ Տիխանովսկայան պատել է, որ իր շտաբը Եվրամիությանն ու ՄԱԿ֊ի հանձնաժողովին տեղեկություններ է ներկայացրել իրավապահների ապօրինի գործողությունների մասին ու պահանջել համապատասխան միջոցներ կիրառել։

«Խուզարկությունների, ձերբակալությունների, քրեական հետապնդումների միջոցով լրագրողներին ու իրավապաշտպաններին, այդ թվում՝ Բելառուսում Եվրոպայի խորհրդի և ՄԱԿ֊ի գրասենյակի հետ համագործակցողներին վախացնելն անթույլատրելի է։ Խոսքի և հավաքների ազատությունները պետք է պահպանվեն ըստ միջազգային ստանդարտների», – գրել է Եվրոպայի խորհրդի մարդու իրավունքների կոմիսար Դունյա Միատովիչը։

https://twitter.com/CommissionerHR/status/1361624634588823552?ref_src=twsrc%5Etfw%7Ctwcamp%5Etweetembed%7Ctwterm%5E1361624634588823552%7Ctwgr%5E%7Ctwcon%5Es1_&ref_url=https%3A%2F%2Fwww.ekhokavkaza.com%2Fz%2F2759

Նախագահական ընտրություններից ի վեր (2020 թվականի օգոստոսի 9) Բելառուսում բողոքի ցույցեր են ընդդեմ գործող նախագահ Ալեքսանդր Լուկաշենկոյի։ Նա պաշտոնավարում է արդեն վեցերորդ ժամկետով։ Բողոքի ցույցերի մասնակիցները պնդում են, որ ընտրությունների արդյունքները կեղծված են, և որ այդ ընտրությունների իրական հաղթողը Սվետլանա Տիխանովսկայան է։ Վերջինս ճնշումների պատճառով ստիպված է եղել լքել երկիրը։

Լուկաշենկոն մեղադրանքները չի ընդունում՝ պնդելով, որ բողոքի ալիքի ետևում կանգնած են «եվրոպական տիկնիկավարները»։